L'Infiestu acueye "El Taller de les Histories"

La editorial asturiana Asturtoons pon en marcha pa los próximos díes 27 y 28 d'avientu "El taller de les Histories", actividá que va desarrollase na Casa la Cultura de L'Infiestu.

L'actividá, que ta organizada pola AMPA del centru en collaboración cola editorial, consistirá nun taller nel que se trabayarán técniques coles que poder dir desarrollando l'argumentu d'una historia. Asina mesmo Enrique Carballeira, ilustrador y escritor piloñés encargáu d'impartir el taller, enseñará dalgunos detalles sobre'l trabayu d'ilustración d'un llibru infantil.
Como cierre de l'actividá, el mesmu día 28 a les seis de la tarde, y na mesma Casa la Cultura, la editorial presentará tres de los sos últimos titulos espublizaos n'asturianu: L'arcu la vieya, de Cristina Muñiz; El lladrón de galletes, d'Amparo Elena Sarrión y Jorge Fernández; y Diariu de Nelo, del propiu Enrique Carballeira.