L'Axenda Didáctica vien un añu más cargada d'actividaes

La Conseyería de Cultura y Turismu amplía nesti cursu 2010/2011 la ufierta d'actividaes pal alumnáu d'asturianu y gallego-asturianu de la Educación Primaria, Secundaria y Bachiller.

L'Axenda Didáctica Escolar, na que participaron el cursu pasáu un total de 20.000 alumnos y alumnes de les diferentes estayes educatives, vuelve a ufiertar pa esti cursu bien d'actividaes de diferente calter: alcuentros con escritores, conciertos musicales, obres de teatru, talleres de cómic y hasta una sesión d'ópera de la mano de la compañía asturiana "Nun Tris".
Según la Dirección Xeneral de Política Llingüística, organizadora de l'Axenda, "l'oxetivu ye averar la lliteratura, el teatru y la música asturiana al públicu más mozu de la mano d’escritores, actores y músicos de l’actualidá asturiana".
Asina, ente la ufierta pa Educación Primaria rescamplen novedaes como'l taller d'Anabel Santiago "Música y cantu pa escolinos y escolines" o los talleres sobre les obres de la editorial Pintar Pintar que llevará alantre la especialista en LLIX Mar Martín. Pela so parte na Educación Secundaria paga la pena sorrayar como novedosu'l taller sobre'l papel de la muyer na música tradicional asturiana que conducirán Florentina Cuadriello y les pandereteres de Fitoria.
Puedes consultar los cartafueyos con toles actividaes nos archivos axuntos, demientres que pa tener accesu a la fueya d'inscripción has de picar equí.