Entama’l taller ‘Enteteyando’ en trés biblioteques municipales d’Avilés
![Taller 'Sones y percusiones' d'Aladanza Taller 'Sones y percusiones' d'Aladanza](https://asturies.com/sites/default/files/taller_sones_y_percusiones_daladanza_3.jpg)
Llueu de desendolcase’l taller 'Sones y percusiones', la iniciativa 'Les tradiciones suenen y presten' va siguir col segundu previstu, ‘Enteyeando’. Va ponese en trés biblioteques avilesines los díes 14 y 28 de mayu y 4 de xunu y ta destináu a neñes y neños d’ente 6 y 10 años.
Aladanza Educación y Tradición ye la responsable d’estes prestoses propuestes qu’entama la Estaya de la Llingua d’Avilés en La Carriona, La Xungarosa y Los Canapés pa que la reciella deprenda costumes asturianes xugando. Con ‘Enteteyando’, en concreto, van poder conocer les construcciones populares d'Asturies y la so rellación colos oficios d'enantes.
Asina, convertiránse en teyeros y teyeres, asoleyando la so creatividá modelando la so propia teya y decorándola colos símbolos tradicionales que más-yos presten. La primera sesión va celebrase mañana en La Carriona, pa llevala llueu a La Xungarosa’l 28 de mayu y a Los Canapés, el 4 de xunu.
El taller tien un llargor d’hora y media, de 18.30 a 20 hores, y ye de baldre, con places llendaes qu’han d’acutase nes propies biblioteques. Caún dispón d’un total de 6.
Na semeya, un panderu fechu a partir de materiales reciclaos nel taller 'Sones y percusiones'.