El VI Nel Amaro sigue con ‘Les madreñes vacíes’ de Carlos Alba

Llueu de la representación de ‘Con M mayúscula’, de Kamante Teatro, llega’l turnu de ‘Les madreñes vacíes’ nel VI Premiu y Festival Nel Amaro de Teatru Profesional en Llingua Asturiana y Gallego-asturiano. Carlos Alba pon n’escena esta obra que naz a partir d’un poema de Miguel Hernández.

El protagonista, un xuglar, atopa a Miguelín, un neñu al qu’esti añu nun-y dexaron nada los Reis Magos. Dada la situación, entrambos entamen un viaxe hacia l’Oriente, onde van descubrir qu’a Gaspar, Melchor y Baltasar secuestrólos el Señor de la Guerra, y van tener que los lliberar.

Alba emplega nesta fábula títeres, música y pallabra poética pa facer viaxar al públicu cola imaxinación. La función va tener llugar esta tarde a les 18 hores nel uvieín Teatru Filarmónica, con entrada llibre hasta completar aforu.

Dos funciones más

El IV Nel Amaro, na so fase de festival, va completase los dos siguientes vienres con la representación de los otros dos finalistes. El viniente va xubir a escenar Factoría Norte pa presentar ‘Aventurina l’ablana’ y el 28 Nun Tris Producciones va facer lo propio con ‘La sierva patrona’.