‘Con M mayúscula’ abre un Nel Amaro con espectáculos finalistes orientaos al públicu infantil y mozu

Esti vienres arranca n’Uviéu’l la fase de festival del VI Premiu Nel Amaro de Teatru Profesional en Llingua Asturiana y Gallego-asturiano. Cuatro son les obres que pasaron el corte, toes orientaes a un públicu infantil y mozu, siendo la primer compañía en defender la so propuesta Kamante Teatro, ‘Con M mayúscula’.

Esta obra cuenta la historia d’Arturo y Clementina, “dos tortuguines moces, allegres y despreocupaes” que se namoren. Nun tarde en casase y “de mano too yera maraviyoso, pero col pasu’l tiempu los suaños de Clementina fueron esfumándose”, yá qu’Arturo “empezó a pensar namás nél mesmu, y a cargar a la muyer con milenta ‘regalos’ qu’a ella nun la facíen nada feliz”.

Luis Vigil ye’l direutor d’esta función na que Luisa Aguilar y Luis Vigil encárguense de la dramaturxa testual, y Ici Díaz y Enrique Dueñas de deféndela nel escenariu. Xosé Firmu García Cosío fixó la traducción del orixinal al asturianu.

Otres trés funciones

La representación de ‘Con M mayúscula’ va celebrase esta tarde a les 18 hores nel Teatru Filarmónica, con entrada llibre hasta completar aforu. Los xueves vinientes, a la mesma hora, va ser el turnu de ‘Les madreñes vacíes’, de Carlos Alba (día 14); ‘Aventurina l’ablana’, de Factoría Norte (día 21); y ‘La sierva patrona’, de Nun Tris Producciones (día 28).