El C.P. Xentiquina organiza una mesa redonda sobre música y cultura asturianes
El colexu públicu de Lieres, nomáu oficialmente de magar esti cursu C.P. Xentiquina, organiza pal próximu xueves 3 de payares una mesa redonda sobre cultura y música asturiana.
La mesa, que va tar moderada pol que fuera maestru del centru Nacho Fonseca, cuntará cola presencia del antropólogu y académicu de la llingua asturiana Roberto González Quevedo, asina como los músicos Héctor Braga y Xosé Antón Fernández "Ambás".
L'actividá va tener llugar nel Casinu de Lieres a partir de les 19.00 hores del próximu xueves 3 de payares y preséntase sol títulu "La música na cultura tradicional asturiana".
El colexu públicu de Lieres tien una llarga tradición de trabayu pedagóxicu nel ámbitu de la música y la llingua asturiana. Gran parte d'esti trabayu foi responsabilidá del que fuera maestru d'esta escuela Nacho Fonseca, que se xubilara l'añu pasáu y que fuera'l director del coru de neños y neñes "Xentiquina" formáu pol alumnáu del colexu.