Ámbitu edita la tercer parte de "Les Bruxes"

I.D.T's picture

La editorial Ámbitu ta acabante asoleyar, sol títulu de Les Bruxes 3. El sombreru de Tila, el tercer númberu de les aventures de les bruxes qu'ideara ya ilustrara Francisco Primiango.

Entamara la serie con llibru Bruxes males, bones bruxes y siguió, l’añu pasáu, col númberu 2, Paquín va a escuela. Nesta tercer entrega los llectores van descubrir por qué del sombreru de Tila nun sal nada, amás de conocer la historia d’Urbano, un ratu mui especial que tien una fame salvaxe y que, al final, resulta nun ser un ratu.

El cuentu arranca con Paquín, el neñu que tienen adoptáu les bruxes, preguntando a Tela y a Tula por qué de los sombreros d’elles salen plantes y animales y del de Tila nun sal un res. Les dos hermanes cuénten-y, entós, que too empezó cuando elles yeren pequeñes y vivíen nun hospiciu porque naide quería les comenencies de tener una bruxa en casa. Daquella, Tila tenía un sombreru de picu del que salíen pómpares de xabón y una amiga tamién bruxa que, al final, resultó ser más mala de lo que parecía.

Francisco Pimiango (Pimiango, Ribadeva, 1973) ye profesor de Filosofía y, anque diz él que ye, «a cachos, ilustrador», dende l’añu 2009 tien publicaos –como dibuxante namás o como autor tamién del testu– seis llibros: El Nuevo Mundo, d’Alicia Barberis; Historia d’un árbol, de Ramón Lluís Bande; L’horru, de J. L. Fernández; Quiero mercar una hermanina, de María Luz Pontón, y los tres de los que ye tamién l’autor de la historia: Bruxes males, bones bruxes, Paquín va a escuela y El sombreru de Tila, los dos primeros tamién traducíos al gallego-asturianu.

 
N'A la Gueta tuvimos la oportunidá d'entrevistalu por mor de la espublización de la primer parte de les aventures de les bruxes.

You are here