Los homes que nun escuchen a les muyeres

Lo primero de too voi entamar diciendo lo que ye pa min “escuchar” , porque dalgún de xuru tará pensando : “ye que les muyeres falen muncho, ésta lo que quier ye mandoniar” y yo refiérome a caltener una conversación normal ente dos o más persones. Opino que lo lóxico sedrá repartir el tiempu ente toes y toos los que tán aconceyaos/es. Bono, más o menos tendría de ser asina; si hai dos falen los dos, la metada pa caún o caúna, si son trés pos 1/3 pa caún/a y d’esi mou tol mundiu pue dicir daqué. Pa min que la xente que me conoz sabe que nun soi de muncho falar, préstame más escuchar y nun m’abulta tar callada porque toi atendiendo a lo que me dicen. Poro, examás me quexare d’ésto, hasta que l’otru día pasóme un casu que fízome pensar nesos homes que tienen por vezu nun escuchar a les muyeres coles que tán. Va pocu tuvi un disgustu con un mozu por esto mesmo y dende entós toi dando vueltes a lo que cuesta facer amistaes y lo rápido que puen perdese por coses d’esta triba, porque bien de vegaes la persona que lo fai nun se decata de lo que ta mal y quiciás que lo fecho puea molestar al otru o la otra.

Tábemos un día esti mozu, una amiga y yo de viax, visitando una ciudá que nosotres nun conociéremos. Ya él, que ye un bon rapaz, peramable, recibiónos de lo meyor, amosándonos tolos sitios que conocía, diendo d’un llau pa otru y desplicándonos la historia de ca llugar. La mio amiga y yo esfrutamos enforma por recibir información y ver lo más interesante, agradeciéndo-y abondo al rapaz los conocimientos que nos apurriaba, amás de tar con una persona que sabía muncho d’esa ciudá y d’esi mou nosotres recoyíamos nel nuesu maxín toa esa información. Tuvimos esi día los trés xuntos, dende la mañana hasta la nueche, llevándolu a xintar y cenar p’agradece-y de dalguna manera les sos atenciones. Al otru día diximos-y que nun s’esmoleciere yá de nosotres porque pensamos que tendría de facer tamién lo de so y quedamos namái pela tarde pa despidinos con tiempu y poder falar dalgo denantes de que colaremos de vuelta p’Asturies.

Yá dixi que nun soi de muncho falar pero la mio amiga tampocu. La xente que somos d’esta mena cuando nun nos importa una conversación nun se nos nota, nun se sabe si tas escuchando porque quies, si tas aburría o entretenía, masque notasenos muncho y rápido cuando nos ximielga l’entusiasmu o cuando tenemos un interés especial en conocer a dalguién o cunta-y dalgo. Esto ye, si tas callada pues tar interesada o non, pero si fala una persona tímida de xuru que tien un interés sinceru. A min esti mozu cayóme bien y que dempués de ser tan agradable con nosotres el día demantes paecióme que les meyores gracies son les que s’apurrien con amuese reales d’apreciu y que lo meyor yera actuar como una persona normal y falar con él, nun fore a quedar cola impresión de que soi rara –eso prefería dexar que se decatare pocu a pocu-. Llevamos-y un regalu que mercáremos pela mañana ya ehí foi cuando anicié a albidrar que dalgo nun diba como debiere. Quería cunta-y onde mercamos el regalu pero nun había manera de que me dexara dicilo. Llueu intentaba desplica-y lo que fexéremos esi día que nun tuviere él pero nun me quedó otru remediu que resumilo nuna fras: yera eso o nada. Dempués punxímonos a falar d’otres coses…ya nun yera un tema qu’él conociere y nosotres non….ya nun vinía a cuentu que falare y nosotres tuviéremos callaes. Nun m’alcuerdu de que falamos, per sí que yera dalgo no que namái s’espresaba él de toes formes. Nun abultaba un migayu lo que fore, qu’él camudaba de tema nel intre. O callaba, miraba pa min y retrucaba pa siguir falando él. Tamién miraba pa min otra vuelta, contestaba y retomaba la so historia u la dexare. Imposible cunta-y nin dici-y un res de lo que m’hubiere prestao falar nin entruga-y coses que tenía na mente. Ye cierto que-y entrugué coses pa facer el paripé de qu’aquello yera una conversación y d’esi mou de xemes en cuando sentíame a mio mesma ya a él metía-y gasolina. Ah, igual tais pensando: “ye que nun-y dicíes nada interesante, muyer”…quiciás, pudiere ser. Toi cierta que si-y digo: ¡¡¡Curiáu, un camión!!! fadríame casu. Masque a min nun m’interesa siempre lo que la xente cuenta –incluyíu esi mozu- y faigo-yos casu lo mesmu. Quiciás nun quede otra vegada con esa persona, masque cuando toi con dalguién nun priorizo namái la mio persona, lo que quiero y m’importa. Si toi con dalguién y namái siento la mio voz doime cuenta y si noto qu’esa persona nun ta a gusto conmigo dexo-y l’espaciu que-y debo. Préstame que si toi con dalguién qu’esi home o muyer tea presente y que tamién-y preste tar conmigo pola amistanza porque nesi contestu ye más importante falar que lo que se diz. Tamién ye verdá qu’hai xente egoísta, homes y muyeres que nun piensen nos demás. Notase-yos que son egoístes neso ya en too, pero esti mozu non, nun ye asina. Nun ye una persona mal educada, ye una persona atenta que mira polos demás y que en xeneral presta-y portase como se debe. El machismu vese perbién cuando quien lo fai piensa que ta faciéndolo bien. Cuando yes un home y pienses que falar solo tu tando con muyeres ye lo normal. Cuando te presten les muyeres que nun faen otra cosa que callar la boca y mirar pa ti. Cuando interrumpir a les muyeres que tán falando nun pienses que sia interumpiles. Masque cuando elles quieren falar ya interumpente a ti nun lo aguantes. Y sobremanera cuando hai esa actitú namái coles amigues pero colos amigos non. Entós nun ye cuestión de mala educación sino de haber sido educau correctamente nuna sociedá machista. Pero hai una cosa que nun soi a entender bien del too y nun me paez tanto chollu; porque aunque tea muy guapu ser el centru atención, la moza a la que de verdá-y prestes de xuro sea la que te interrumpa.

Torna: Helena Trexu Fombella

Eva del Fresno Díaz ye trabayadora social y especialista en polítiques de xéneru pola Universidá d'Uviéu. Feminista y afialiada a EQUO Asturies.