Amplíase la presencia d’empreses con productos n’asturianu nel puestu d’Iniciativa na FIDMA

De 9 a 13. El númberu d’empreses con productos y servicios n’asturianu que vien acoyendo estos últimos años el puestu d’Iniciativa pol Asturianu na Feria Internacional de Muestres d’Asturies (FIDMA), qu'abre les sos puertes el sábadu, amplíase nesta edición, na que VerAsturies tamién va contar con un espaciu propiu.

El coleutivu que trabaya pola normalización del idioma en toles estayes caltién asina la so presencia nesti eventu multitudinariu, con más de 700.000 visitantes nos 16 díes d’apertura al públicu. D’esta forma da a conocer el so llabor y visibiliza l’idioma, amás de facilitar un escaparate pa empreses qu’usen l’idioma nos sos productos y servicios.

Si na edición pasada, marcada entovía pola pandemia, yeren 9 les empreses que tuvieron espaciu nel puestu instaláu nel pabellón 3-4 del Palaciu de Congresos, abiertu n’horariu de 11 a 14.30 y 16.30 a 21 hores, esti añu esti númberu amplíase a 13. Repiten toes les que taben, esto ye, Puru Remangu, Cuatro Gotes Producciones, Tiza y Peonza, Trabe, Cerveza Caleya, Cartonajes Vir, 9000 Soluciones, Acuto Xuegos y Nordés Móvil, y incorpórense Aitrad, Asturcón Seguridá, Ediciones Radagast y Ringo Rango.

D’esta forma, Iniciativa pol Asturianu pretende facer llegar a la ciudadanía “que l’asturianu ye un elementu de creación empresarial, xenerando actividá económica, puestos de trabayu y, polo tanto, riqueza”. Amás, con tola variedá de productos y servicios de les empreses “quier amosar que la llingua asturiana puede ser un elementu de diferenciación y qu’aporta un valor añadíu a los productos y servicios qu’ufierten estes empreses”.

Día de la Llingua Asturiana

Ésti ye’l quintu añu nel que’l coleutivu ta presente na FIDMA, que va abrir les sos puertes el sábadu hasta’l 21 d’agostu. Una edición, la sesentena quinta, que va ser especial porque va contar con un Día de la Llingua Asturiana.

Esta vieya aspiración d’Iniciativa pol Asturiana aceptóla la Cámara de Comerciu de Xixón, qu’escoyó’l sábadu 20 como xornada pa la celebración. La organización ta preparando un bayurosu programa d’actividaes dientro del recintu ferial que va incluyir una ruta guiada al Muséu del Pueblu d’Asturies y actividaes pa la reciella, una visita institucional pelos stands de la Feria de Muestres qu’usen l’asturianu y un recital poéticu xunto cola Asociación d’Escritores d’Asturies, ente otres actividaes por confirmar.

Filoxes y taces con frases en llingua asturiana

Un espaciu nuevu na FIDMA nel que tamién va tener protagonismu l’asturianu ye’l de VerAsturies, plataforma multimedia sobre turismu y ociu qu’edita la revista ‘ViaxAst’. Va asitiase nel puestu 24 del pabellón 3 del recintu y va amosar productos y llugares pa descubrir n’Asturies, amás de poner a la venta filoxes y taces con frases n’asturianu qu’estrenen pa la ocasión.

Na semeya, puestu d'Iniciativa pol Asturianu na edición pasada de la FIDMA.