Xaime Martínez y L-R van estrenar ‘Amosando’, ciclu pa presentar les novedaes discográfiques de la música asturiana

Un conciertu acústicu, con aforu reducíu, y una entrevista que s’emite per Internet a tol planeta. Eso ye ‘Amosando’, propuesta novedosa pa presentar les novedaes discográfiques asturianes que van estrenar el 16 de marzu L-R y Xaime Martínez.

Javier Lueje va encargase de la grabación nos sos estudios de Xixón y Goxe de la producción d’esti proyeutu “pa visibilizar a la música asturiana dientro y fuera de les nuestres fronteres; una ferramienta promocional adaptada a los vezos actuales de consumir música; una iniciativa pionera n’Asturies influyida por otres esperiencies asemeyaes exitoses notres partes del planeta”, espliquen dende Musicasturiana, organizadores de ‘Amosando’. D’esta forma preténdese “valtar ún de los más grandes problemes que tien la música asturiana: la poca promoción”.

El 16 de marzu va estrenase ‘Amosando’ cola participación de Xaime Martínez, autor del esitosu ‘Ósculos d’agua nel Imperiu Asturianu’ –editáu por Araz, empresa editora tamién d’Asturies.com–, y L-R, el dúu formáu por Leticia Baselgas y Rubén Bada que tán acabantes de llevar la so propuesta musical baxo la etiqueta post-fok a un discu tres una campaña de cuestación popular pela rede que superó toles espeutatives puestes nun primer momentu. Dambos van poner un conciertu acústicu colos cantares de los sos trabayos énte un públicu reducíu que va poder preguntar y aldericar colos artistes en vivo, p’asina fomentar la cercanía y interrellación ente músicos y siguidores.

Les entraes pa l’asistencia a les actuaciones son de baldre, anque van repartise per sortéu ente tola xente interesao. Tres la estrena, prevista pal 16 de marzu a les 20 hores nos estudios asitiaos n’El Natahoyo, van programase otres cuatro sesiones, entovía por confirmar.