Leticia Baselgas (L-R): “Entendemos la música tradicional asturiana como daqué vivo y en progreso”

Leticia González Menéndez (voz y percusión) y Rubén Bada (guitarra llétrica) conformen L-R, dúu que lleva dos años dando que falar dientro y fuera d’Asturies cola so propuesta que reconstrúi la música tradicional asturiana. Asturies.com faló cola panderetera de Baselgas nacida en Xixón nel 1984 sobre esti proyeutu que va tener discu.

¿Cuándo va ser una realidá el primer trabayu discográficu de L-R?

A final d’añu. Llevamos yá más de dos años tocando per festivales y yá teníemos ganes de metenos nel estudiu. Esti branu pasáu grabamos una maqueta que nos sirvió de carta de presentación n’otres partes d’Europa y tamién pa ver de verdá si la xente quería un discu de L-R. Resultó que sí. Tamién ye verdá que’l grupu ta siendo una una esperiencia mui interesante pa nós y queríamos dexar rexistráu tol trabayu d’estos dos años.

Pa llanzalu tienen en marcha una campaña de cuestación popular na rede que nun tardó en superar la cifra de 2.500 euros marcaos. ¿Esperaben esa respuesta del públicu?

Yá sabíemos qu’había munchos naguando pol discu pero nun esperábemos llegar al oxetivu en tan pocu tiempo. Tamos ablucaos. Inda queden munchos díes y yá tamos a más del 135 por cientu. Ye un xubidón. Agradezse muncho el sofitu de la xente; anímanos a siguir trabayando fuertemente.

¿Hasta cuándo va tar abierta?

La campaña va tar hasta primeros de payares y esperamos que’l llanzamientu seya a primeros d’avientu. Tenemos recompenses varies que van dende la descarga dixital al conciertu priváu. Munchos amigos tan collaborando mercando ‘packs’ que tamién tienen camisetes y ‘tote bags’. Tamién hai dos persones que van llevar como recompensa una pandereta privada y una clase particular onde deprender un pocu más la nuestra música. Tamos ensin pallabres y mui agradecíos.

¿Qué vamos atopar nesti trabayu?

La xente va poder escuchar clásicos de L-R como la ‘Danza La Xarra’ o la ‘Muñeira Degaña’, pero tamién dalguna sorpresina que tamos preparando. Rubén ta faciendo un llabor de producción ablucante y yo toi trabayando col diseñu ya imaxe. Esti discu ye una apuesta mui personal y arriesgada en dalgunos momentos, pero define lo que somos Rubén y yo, y sobre manera la nuestra forma d’entender la música tradicional asturiana como daqué vivo y en progreso.

Tamién van llanzalu en vinilu. ¿Por qué apuesten por esti formatu?

Gústanos el vinilu porque al final somos unos románticos. Antes comprábase la música y establecíase col oxetu –col discu, el cassette, el vinilu…– una rellación casi de cultu. Los vinilos son fetiches y queríamos que’l nuestru primer trabayu fuera daqué especial. Tamién ye verdá qu’hubo xente que lu pidió n’esclusiva y nun pudimos resistinos a facelo. Eso sí, vamos facer una edición mui llimitada y esclusiva, asina que’l que lo quiera va tener que encargalu via Verkami.

L-R emplega la etiqueta post-folk.

Anguaño paez que ye imprescindible venceyase a un ‘hastag’, asina que cuando entamábamos creamos una etiqueta propia: el post-folk. Nestos dos años, el ‘post’ yá llegó a otros grupos y hai compañeros que yá tan usando etiquetes como ‘post-tonada’. Asina ye que’l conceutu ta definiéndose a él mesmu y paez q’arrodia tolo que tien que ver con una nueva reconstrucción de la música tradicional. Dende’l mio puntu de vista como panderetera, la mio intención ‘post-trad’ ye refacer la imaxe de la panderetera y meter esti instrumentu n’otros contestos musicales. ¿Por qué una panderetera nun puede tocar blues?

¿Ta consolidándose una escena nueva dientro de la música asturiana basada na innovación dende lo tradicional?

La innovación dende lo tradicional lleva desendolcándose dende la década de los 80. Rubén y yo munches veces alcordámonos de Trasgu y la so ‘La Isla de Hélice’ y siguimos flipando colo rompedor que foi y sigue siendo. Pásanos igual con Llan de Cubel y otros grupos qu’abrieron una fienda que nun debiera escaecese. La música ye daqué vivo, igual que la tradición por muncho que queramos que tea zarrada dientro’l muséu.

Lo que sigue faltando son les ayudes, como bien destacó Xune Elipe na presentación del XXX Conciertu pola Oficialidá, onde tamién actuaron.

Sí, ye verdá que se necesiten perres y dalgún qu’otru gabitu por parte de les instituciones, pero sobre manera lo que se necesita ye un reconocimientu que nunca nun tuvimos. Deberíen ‘dexanos facer’ y non ponenos trabes. Nun deberían esistir determináu tipu d’asociaciones que, a base de pidir perres, acaben colos festivales que nos sofiten; nun se debería prohibir tocar nos chigres…

Recién acaben de tocar en Getxo. ¿Qué tal la esperiencia?

Tocar lloñe d’Asturies ye siempre bono, permítenos esportar la nuestra música y llevala a contestos totalmente diferentes. En El Respiradero tuvimos compartiendo escena col Niño de Elche y otros artistes con propuestes arriesgaes. Foi mui interesante. Esti branu tuvimos tocando n’Inglaterra y la xente quedó encantada con L-R y sobre manera cola tradición asturiana. Ye impautante ver como xente de fuera valora y cuida de la nuestra tradición casi más que los de casa y exemplu d’ello foi que’l programa ‘Port’ de la escocesa BBC Alba emitió recién un capítulu sobre Asturies y les sos tradiciones. No tocante a los medios de casa, meyor nun falar.

¿Qué proyeutos tienen en mente pa depués del espublizamientu del discu?

Tenemos una xira per Bretaña en xineru na que presentaremos el discu. Vamos tocar nel Nouveau Pavillon de Nantes y pal 2019 habrá munches sorpreses visuales qu’inda nun podemos desvelar.