“Vamos ver si se pue resolver, pero'l marcu de negociación ye mui complicáu”, confiesa Palacios

Nun hebo avances na negociación de la reforma estatutaria, con Foro calteniendo les sos esixencies fiscales. “El marcu de negociación ye mui complicáu” aseguró Rafael Palacios, voceru de Podemos, que declaró a la salida de la xunta celebrada esti llunes que “26 diputaos vinimos a falar d’una cosa y 1 d’impuestos”, mentes qu'Alejandro Suárez, d'Izquierda Xunida (IX), apuntó que "la negociación ta escosada", coles "cartes toes boca arriba".

“Si Adrián Pumares cambia d’idea d’equí a qu’acabe’l mes de xineru, nosotres vamos tener prendíu’l teléfonu 24 hores porque sabemos que’l momentu pa reconocer los derechos llingüísticos, el momentu pa la oficialidá ye agora, y pensamos que pue recapacitar y llograr esa mayoría de 27 que necesitamos pa poder iniciar na Xunta Xeneral esti procesu”, añadió la coordinadora autonómica, Sofía Fernández Castañón. “La negociación de los impuestos habrá facela n’otra parte, esto nun ye l’espaciu, pero la puerta ta abierta siempre. Hai entovía tiempu”, siguió Palacios, col 31 de xineru como fecha llende afitada dende Podemos y IX.

El secretariu d’Estratexa Política de la coalición, que participa nes negociaciones xunto con Víctor Suárez, fixo un resume asemeyáu al de Ciañu: “26 votos a favor de la reforma del Estatutu y hai 1 qu’asitia la cuestión de las fiscalidá como elemento insalvable”. “Si Foro quier llamar y volver a sentase a negociar dientro d’esi tiempu, entovía daría marxe pa qu’hubiera una reforma del Estatutu nes Cortes, pero “mientras la fiscalidá siga siendo insalvable, el bloque de la izquierda nun se va mover”.

Nun tán previstes más xuntes, sacante movimientu de Foro, porque “la negociación ta escosada. Yá tán les cartes toes boca arriba y los plantegamientos bien asitiaos: ye Foro’l que tien que responder frente a trés partidos si sigue calteniendo esa posición inflexible”, aseguró Suárez.

"Nun dio opciones", diz la FSA, y Pumares acusa a la izquierda de pretender una "reformina"

Dende la FSA, mentes, Dolores Carcedo, vocera parllamentaria, señaló que “hai 3 partíos de la izquierda que tán a favor de reformar l’Estatutu y la oficialidá, y hai un partíu que tien como oxetivu baxar los impuestos y que dixo non a la oficialidá. Nun dio opciones”.

Pela so parte, Pumares, en declaraciones a TPA, apuntó que nun se quixo avanzar “neses propuestes que punxo Foro Asturies sobre la mesa, y siguimos na mesma situación qu’hai selmanes”. Acusa al bloque de la izquierda de “anteponer cuestiones ideolóxiques a un alcuerdu tresversal” y de pretender una "reformina".

Na imaxe, xunta d'esta mañana, con Pumares en primer planu, les representantes de la FSA a la izquierda y los d'IX enfrente. Semeya propiedá d'IX.