“Nun hebo precedente d’una negociación como ésta nel restu de comunidaes”, recuerda Iniciativa, que pide “xenerosidá” a Foro

Iniciativa pol Asturianu fai un llamáu al entedimientu ente toles fuercies polítiques que tán participando nes conversaciones pa la reforma del Estatutu “y, de manera especial, a Foro”, al que-y pide “xenerosidá”. “Nun hebo precedente d’una negociación como ésta nel restu de comunidaes autónomes con llingua propia”, recuerda.

“Reclamamos a Pumares valentía y xenerosidá pa ser partícipe y figura fundamental pa la hestoria nesta reforma del Estutu d’Autonomía d’Asturies. Pero tamién esiximos respetu a la ciudadanía nesti alderique nel que se tendríen de tar negociando cuestiones propies de la reforma estatutaria, non de política fiscal, que forma parte d'otru ámbitu bien distintu a ésti”, considera la organización.

El nun algamar la oficialidá ye pa Iniciativa pol Asturianu “una derrota colectiva, magar que con mayor responsabilidá p'aquellos que ponen sobre la mesa bloquéu en llugar de propuestes que permitan llegar a un alcuerdu necesariu y demandáu pola sociedá”. “Nun podemos dexar pasar esta oportunidá” pa “revertir una anomalía constitucional como ye la falta de drechos llingüísticos de los y les falantes d'asturianu y gallegu-asturianu”, insiste.

Na imaxe, representantes de Podemos na negociaciación, Rafael Palacios y Sofía Fernández Castañón, y de Foro, Adrián Pumares. Semeya de Podemos Asturies.