“Tamos dispuestos a apoyar una reforma del Estatutu qu’incluya la oficialidá, pero nun ye la única reforma que necesita Asturies”, afirma Pumares

“Asturies nun se pue permitir tener más impuestos que les comunidaes autónomes del entornu”, apunta Adrián Pumares, secretariu xeneral de Foro, que llamenta’l refugu “de planu” de les fuercies d’izquierda a negociar la cuestión fiscal plantegada pol so partíu. Sobre los plazos, el diputáu insiste en que “la fecha del 31 de xineru nun la fixi mía”.

“Dende Foro Asturias diximos que la reforma del Estatutu ye necesaria, tamos convencidos n’asitiar a Asturies al nivel del restu de comunidaes autónomes, pero nun ye la única que necesita Asturies”, defende’l llavianés, que pon exemplos cercanos, como Galicia, Cantabria y Castilla y Lleón. Les modificaciones fiscales, centraes en trés puntos –la eliminación de facto del impuestu de socesiones, bonificándolu hasta la llende d'un millón d'euros; la rebaxa en mediu puntu porcentual de los cuatro primeros tramos autonómicos del IRPF; y la fiscalidá diferenciada pa zones rurales, ente otros supuestos, ésta última sí valorada pola otra parte–, conformen parte d’esa esixencia puesta pola Comisión Direutiva de la formación y que Pumares espuso na Xunta Xeneral n’ochobre, pero que, según esplica, IX, FSA y Podemos refugaron “de planu” entrar a negociar, siquier rebaxar les cantidaes plantegaes por Foro.

“26 diputaos vinimos a falar d’una cosa y otru d’impuestos”, coincidieron ayeri en señalar les trés fuercies d’izquierda, a lo que Pumares respuende que “ellos saben perfeutamente que ye trampa; vienen a construyir el so rellatu”. “Tamos dispuestos a apoyar una reforma del Estatutu qu’incluya la oficialidá, pero nun ye la única reforma que necesita Asturies”, insiste’l diputáu, que considera que Foro yá dexó nidia la so postura, “que ye la de la Comisión Direutiva, tomada de manera orgánica; yo nun soi un versu llibre”.

Almite les crítiques –“ye dalgo a lo que tolos políticos tamos espuestos y hai que respetales al máximo”–, ve difícil un cambiu nes postures y asegura que la campaña d’ataque y presión dende VOX y la Plataforma contra la Cooficialidad, que siguía esta mesma mañana, nun influyó en nengún momentu na so posición. “Nun cambié nin un poco’l mio discursu”, asegura.

Los trés quintos

Respeuto a la llende temporal puesta nesti mes pola otra parte negociadora pa la reforma estatutaria apunta que “la fecha del 31 de xineru nun la fixi mía” y que nun mira posibles aritmétiques parllamentaries futures, y argumenta la esixencia, “qu’a muncha xente nun-y gustó”, de los trés quintos p’aprobar y modificar la norma posterior que desendolcara la oficialidá, aceptada finalmente pola izquierda, na inconcreición por parte del Gobiernu d'Adrián Babón de la ‘oficialidá amable’ que defendía. “Nós apoyamos la non obligatoriedá y plantegamos esta opción pa garantizar el consensu”, esplica.