Últimos díes pa matriculase a la prueba de conocencia del mes de mayu de l'ALLA

L'esame va celebrase na mañana d'esti sábadu nel llar social de la institución académica.

El xueves 25 fina'l plazu pa formalizar la matrícula pa la segunda de les dos pruebes añales de conocencia d'asturianu –xineru y mayu– qu'entama l'Academia de la Llingua Asturiana (ALLA). Una iniciativa que desendolca "sabiendo'l fondu interés de munches persones de llograr que se reconoza la so conocencia de la llingua y manifestar asina'l so fondu amor al idioma asturianu".

Como ye vezu, ésta va dividise en dos partes, escrita y oral: la primera va principiar con un dictáu, pa siguir con una torna, una serie d’exercicios gramaticales y una redaición, y finar con una conversación con ún de los miembros del xuráu. Les persones declaraes aptes van recibir un documentu onde s’afite la conocencia nel nivel 1 o básicu según los calces siguíos por esta institución que-yos permitirá entrar direutamente nel cursu de nivel avanzáu de la Universidá Asturiana de Branu (UABRA).

P'aprobar han d’amosar un dominiu tanto de les normes llingüístiques como de la situación actual del idioma y del procesu de normalización nel que ta inxertu. L'esame, de dos hores de llargor aproximao, va desendolcase a partir de les 10 hores nel llar social de l'ALLA, anque ye necesario tar enantes, a les 9.50 hores, y tien un costu de 20 euros.

Na imaxe, un momentu de la prueba de xineru. Semeya propiedá de l'Academia de la Llingua Asturiana.