L'ALLA facilita a los aspirantes un modelu de la prueba de conocencia

La de xineru, primera de les dos convocatories añales, va celebrase'l sábadu.

"Sabiendo'l fondu interés de munches persones de llograr que se reconoza la so conocencia de la llingua", amás de pa manifestar asina'l so fondu amor al idioma asturianu, l'Academia de la Llingua Asturiana (ALLA) entama un añu más la Prueba de Conocencia de Llingua Asturiana, con cites esti mes y en mayu. Un esame que, de ser calificáu aptu, certifica, según el sistema formativu de la institución, el nivel llingüísticu elemental d’asturianu.

Como novedá, la institución facilita un modelu de prueba pa que los aspirantes conozan el tipu d'exercicios a los que se van enfrentar y puedan preparar meyor la prueba. Ésta arranca con dos actividaes de comprensión escrita y sigue con otra d'espresión escrita (redaición), dos de comprensión oral y trés d'usu del asturianu.

Completa la prueba la estaya d'espresión oral pa la que cada persona ha preparar un tema pa esponer a ún entrevistador de manera individual, amás d'un segundu exercicu plantegáu pola ALLA. P'aprobar ye necesario amosar conocencia y dominiu del funcionamientu gramatical del asturianu y de la normativa académica; un emplegu amañosu de la llingua, puestu en práutica gracies a exercicios gramaticales y de composición escrita; y usu na fala de la llingua asturiana, amás de conocencia del allugamientu del idioma dientro de la sociedá asturiana y del procesu de normalización en que ta inxertu.

Dende la institución encamienten tamién la llectura de les 'Normes ortográfiques' (2021, octava edición) y de la 'Gramática de la Llingua Asturiana' (2008, tercer reimpresión), y de testos fechos acordies cola normativa. De ser declaráu aptu l'aspirante va recibir un certificáu dixital onde s’afite la conocencia nel nivel 1 o básicu y podrá acceder de manera direuta al 'Cursu avanzáu de llingua asturiana' de la Universidá Asturiana de Branu (UABRA).

Matrícula abierta hasta'l miércoles

La Prueba de Conocencia de Llingua Asturiana va tener llugar el sábadu a les 10 hores nel llar social de la institución n'Uviéu, cola necesidá de tar ehí a les 9.50 hores. La duración del esame ye d'unes 2 hores.

Les persones interesaes tienen hasta'l miércoles pa formalizar la matrícula, con un costu de 20 euros, que se pue facer al traviés d'esti enllaz. Pa más información, l'ALLA facilita'l númberu de teléfonu 985 21 18 37 y la direición de corréu electrónicu informacion@alladixital.org.

Na semeya, Xosé Ramón Iglesias Cueva, secretariu de l'ALLA, da indicaciones a los aspirantes de la prueba de xineru del 2023.