L'ALLA convoca la prueba de conocencia de xineru

Esti esame recuperóse en mayu depués del parón obligáu pola pandemia de COVID-19.

El sábadu 28 va celebrase la prueba de conocencia de xineru de l'Academia de la Llingua Asturiana (ALLA), la primera que s'entama pa esti mes dende'l 2020. Una iniciativa que desendolca "sabiendo'l fondu interés de munches persones de llograr que se reconoza la so conocencia de la llingua y manifestar asina'l so fondu amor al idioma asturianu".

Como ye vezu, ésta va dividise en dos partes, escrita y oral: la primera va principiar con un dictáu, pa siguir con una torna, una serie d’exercicios gramaticales y una redaición, y finar con una conversación con ún de los miembros del xuráu. Les persones declaraes aptes van recibir un documentu onde s’afite la conocencia nel nivel 1 o básicu según los calces siguíos por esta institución que-yos permitirá entrar direutamente nel cursu de nivel avanzáu de la Universidá Asturiana de Branu (UABRA).

P'aprobar han d’amosar un dominiu tanto de les normes llingüístiques como de la situación actual del idioma y del procesu de normalización nel que ta inxertu. L'esame, de dos hores de llargor aproximao, va desendolcase a partir de les 10 hores nel llar social de l'ALLA, anque ye necesario tar enantes, a les 9.50 hores.

El plazu de matrícula, con un costu de 20 euros, va tar abiertu hasta'l miércoles 25 y pue tramitase al traviés d'esti formulariu.