Dimite Pardo de Vera pol retrasu nos trenes de Feve p'Asturies

Tamién abandona'l cargu presidente de Renfe, Isaías Taboas, el mesmu día nel que los presidentes Adrián Barbón y Miguel Ángel Revilla van aconceyar en Madrid cola ministra.

La secretaria d’Estáu de Tresportes, Movilidá y Axenda Urbana, la gallega Isabel Pardo de Vera, que Barbón defendió estos díes pol so conocimientu de les necesidaes asturianes en materia ferroviaria, presentó esta mañana la so dimisión énte Raquel Sánchez Jiménez. Nun foi la única, yá que'l máximu dirixente de la empresa pública tomo'l mesmu determín.

Con ésti son cuatro les persones que pierden el cargu pol retrasu nos trenes de Feve que necesiten Asturies y Cantabria pa sustituyir los vieyos, yá al límite d'usu, pol un error nes midíes de los túneles que facía que foran más pequeños que los actuales. El 6 de febreru Adif cesó al responsable d'Inspeición y Teunoloxía de Vía, y Renfe del Área de Xestión de Material de Renfe Viaxeros nel momentu de desendolcu del proyeutu de modernización de los vehículos.

Postura común

A les 16.30 hores ta previstu l'aconceyamientu de Barbón y Revilla con Sánchez Jiménez na sede del Ministeriu de Tresportes, Movilidá y Axenda Urbana. Asturies y Cantabria caltienen una postura común na demanda de compensaciones y plazos pol retrasu na llegada de los trenes, que nun s'esperen hasta'l 2026 cuando los primeros deberíen tar pa esti añu.

Na imaxe, Pardo de Vera, xunto con Barbón, el mes pasáu na so visita a Asturies p'aconceyar col Gobiernu y axentes sociales pa informar sobre los retrasos na apertura de la variante de Payares. Semeya obra d'Armando Álvarez.