Torna'l Descensu Internacional del Seya cola participación del K-2 de Bouzán y Fiuza

Les Arriondes y Ribeseya viven una gran espeutación depués de dos años ensin la Fiesta les Piragües, que va emitir TPA en direuto.

Por fin ta equí'l LXXXIV Descensu Internacional del Seya. La llarga espera provocada pola pandemia de COVID-19 fina mañana al meudía, cuando va tornar a sonar el 'Asturies patria querida' nes gargantes de los miles d'asistentes que s'esperen na ponte de Les Arriondes y va dase la salida a la competición.

Esta edición va recordase, amás de por ser la de la vuelta de la normalidá, pol retornu del K-2 ganador n'ocho ocasiones, del 2010 al 2017, formáu por Walter Bouzán y Álvaro Fernández Fiuza. Foi'l gallegu'l que convenció al ribeseyanu pa tornar esti añu a una prueba na que nun participaben dende la so victoria última, lo que nun quita pa que caltengan la etiqueta de favoritos.

El meyor tiempu na contrarreló clasificatoria, que da la meyor posición na salida, foi la piragua del corveranu Miguel Fernández Castañón y José Julián Becerro, la que llevó'l trunfu na edición última del Seya, nel 2019. Los segundos esi añu, los franceses Quentin Urban y Jeremy Candy, marcaron 6 segundos menos, mentes que Bouzán y Fernández Fiuza van partir terceros al tardar 7 segundos más, y Julio Martínez y Emilio Llamedo, cuartos a 9 de los primeros.

Esti añu'l ríu baxa con poca agua, polo que la carrera va tornase más téunica y dura. En K-1, el meyor tiempu marcólu Iván Alonso.