La igualdá nel Seya promete una edición emocionante: los diez primeros, en 14 segundos

Los ganadores actuales, los franceses Quentin Urban y Jeremy Candy, rexistraron el novenu puestu na crono. Los alemanes Max Hoff y Claas Gebhardr van salir los primeros na prueba.

El LXXXV Descensu Internacional del Seya promete ser una edición emocionante y igualada. Les diez primeres K-2 rexistraron ayeri tiempos mui asemeyaos, separtaes namás por 14 segundos.

El campeón olímpicu en Rio 2016 col K-4 1.000 metros d'Alemaña, bronce en K-1 en Londres 2012 y plata nes últimes de Tokyo en K-2, Hoff, acompañáu por Gebhardr, marcó 12.10 ente la ponte de Lloviu y la de Ribeseya, y va tener la salida más llimpia. Un tiempu de 12.12 fixeron Alberto Llera y Nelson Roberto Geringer (Club Piragüismo El Sella) y 12.14 Miguel Fernández Castañón y Luis Amado Pérez Blanco (Club Fluvial O Barco).

Álvaro Fernández Fiuza, que nesta ocasión participa con Guillermo Fidalgo, sal sestu (12.17), y l'históricu Julio Martínez, con Julián Daniel Salinas, octavu (12.20). Walter Bouzán, pareya habitual de Fernández Fiuza, participa en K1, onde marcó'l meyor tiempu.

La falta de lluvia esti branu fai que'l ríu baxe con pocu caudal. Sicasí, la situación actual nun va desllucir l'espectáculu.

La Fiesta les Piragües

El Seya va tar acompañáu, como ye norma, d'un gran ambiente na salida, el trayeutu y la llegada. Les Arriondes y Ribeseya acueyen yá munchos visitantes pa vivir la Fiesta les Piragües y siguir una prueba que va tener entamu al meudía cola emotiva interpretación del himnu d'Asturies y que va poder siguise en direuto per TPA.

Na semeya, salida nuna edición pasada del Seya.