Sosa caltién el dominiu llatinoamericanu na Vuelta a Asturies

El colombianu releva a Carapaz y Quintana como ganadores de la carrera asturiana al superar a Yates, que se vieno abaxo en L'Acebu y recuperó con un trunfu na meta d'Uviéu.

Los dos grandes favoritos a ganar la LXIV Vuelta a Asturies-Julio Álvarez 'Mendo' cumplieron les espeutatives y foron los grandes dominadores de la competición. Iván Ramiro Sosa (Movistar) llevó la segunda etapa, con final en Cangas del Narcea, y la xeneral, mentes que Simon Yates (BikeExchange-Jayco) venció na primera y na tercera.

Foi L'Acebu'l que decidió la carrera. El ciclista inglés acusó'l calor y el colombianu aprovechó la ocasión pa sacar 11 minutos na llinia de meta asitiada a 17 quilómetros de la cima.

Na etapa final Movistar, consciente de que nun yá nun yera peligrosu pa la xeneral, dexó n'El Violeo facer a Yates, que, como en La Pola Ḷḷena, ganaría la etapa, recuperando sensaciones de cara al arranque del Giro mañana n'Hungría. L'equipu español controlaría bien a los rivales y nun pasaría apuros pa caltener el maillot azul de líder de la Vuelta a Asturies.

El segundu puestu de la xeneral foi pa Lorenzo Fortunato (Eolo-Kometa), a 15 segundos de Sosa, y el terceru pal francés Nicolas Edet (Arkéa-Samsic), a 44, mesmu tiempu que marcó'l vascu Mikel Bizkarra (Euskaltel-Euskadi). Dani Navarro (Burgos-BH) llegó a Uviéu como'l meyor asturianu, decimosegundu a 4 minutos, mentes qu'Iván García Cortina (Movistar) finó'l trentenu sestu a 21 minutos y 54 segundos.

5 victories siguíes

El trunfu de Sosa ye la quinta consecutiva d'un ciclista llationamericanu na Vuelta a Asturies. Enantes el so paisanu Nairo Quintana (2017 y 2021) y l'ecuatorianu Richard Carapaz (2018 y 2019) se proclamaron campeones, anque la primera del colombianu llego a posteriori pol positivu del alicantín Raúl Alarcón.