Sigue la medra de contaxos: 319 esti martes

Na xornada finó una muyer de 83 años.

L'aumentu de contaxos nun apara n'Asturies, yá somorguida nuna tercer fola de la pandemia de COVID-19 de consecuencies entovía impredecibles. Ayeri, a falta de los datos oficiales, ensin actualizar dende'l llunes, comunicáronse 319 casos nuevos, 63 más que'l día anterior y la cantidá más alta dende'l 24 de payares, cuando se rexistraron 399.

El Serviciu de Salú del Principáu d'Asturies (SESPA) fixo 4.565 pruebes de diagnósticu d'infeición activa y la tasa de positividad asitióse nel 8,28 por cientu. El domingu, a 7 díes, yera del 6 por cientu –l'actualización dada a lo llargo del día aumenta al 7 por cientu esti porcentaxe–.

Hai que llamentar una muerte, una residente d'un centru de mayores de 83, que suma la perda 1.390 dende que principió l'andanciu –los datos oficiales sumen un fináu non contabilizáu nos díes anteriores que pon el total en 1.391–. 242 pacientes tán hospitalizaos con confirmación o sospecha de COVID-19 y 54 na UCI, 6 y 1 más que'l llunes, de manera respeutiva.