El miércoles detectáronse 273 casos nuevos

Son 46 menos que’l martes, anque se trata de la segunda cifra más alta dende payares.

A falta de conocer los datos oficiales de la COVID-19, la Conseyería de Salú informó de 273 contaxos ayeri. El día anterior la cifra ascendió a 319, mentes que’l llunes quedó en 256.

Na xornada fixéronse 3.802 pruebes de diagnósticu d'infeición activa, polo que la tasa de positividá asitióse nun 8,07 por cientu. A 7 díes, el martes taba nun 7 por cientu.

Hai que llamentar la muerte d’una muyer de 79 años, la 1.392 del andanciu. Mentes, 249 persones tán hospitalizaos con confirmación o sospecha de COVID-19 y otres 55 na UCI, 7 y 1 más que’l martes, de manera respeutiva.

39 biltos activos

Asturies informó al Ministeriu de Sanidá de la esistencia de 39 biltos activos, 21 más qu'hai dos selmanes, que sumen un total de 562 casos. 17 d'ellos detectáronse estos 7 díes últimos, comunica Salú.