Rodríguez Monteavaro presenta n'A Veiga'l poemariu 'Oi, que dice mamá que volvas'

La obra resultó ganadora del I Premio Ría del Eo de Poesía en Galego-asturiano, correspondiente al añu 2021.

Depués de tornar de México, onde participó nel IX Festival Mundial de Poesía Contemporánea San Cristóbal, Miguel Rodríguez Monteavaro afronta un ochobre con una axenda bien cargada. La primer cita va ser esta tarde, a les 19 hores, na Sala d'Esposicióis de la Casa da Cultura da Veiga: la presentación de 'Oi, que dice mamá que volvas'.

Esti poemariu, coeditáu por Impronta y el Gobiernu, espublízase en versión billingüe en gallego-asturiano y inglés, con traducción de Jacob Rogers, mereció la primer edición del Premio Ría del Eo de Poesía en Galego-asturiano y agora llega a los llectores. L'actu va contar cola presencia del alcalde César Álvarez Fernández y del direutor xeneral d'Aición Cultural y Normalización Llingüística, Antón García.

Afinidaes Eleutives, QED y estudiu llingüísticu

El vienres el bualés va participar nuna sesión del ciclu Afinidaes Eleutives del Ministeriu de Cultura y Deporte qu'axunta a escritores de diferentes llingües estatales. Va ser a les 19 hores na uvieína Llibrería Trabe cola poeta gallega Lorena Souto como compañera, actu que va presentar Rafael Rodríguez Valdés.

Esti mes tamién va celebrase la primer de les trés sesiones del II Ciclu de Poesía QED, que coordina Rodríguez Monteavaro, con presencia del Niño de Elche, Lorena Álvarez y Alejandro Fernández-Osorio na Biblioteca d'Asturies 'Ramón Pérez de Ayala' (día 27, 19 hores). Y yá en payares el tamién filólogu va presentar n'Asturies el so 'Estudiu llingüísticu nel centru-occidente asturianu (ELCOA)', un importante trabayu qu'edita Trabe y que dio a conocer yá na Universidad de Salamanca.