Rodríguez Monteavaro fina n'Uviéu coles presentaciones del poemariu 'Oi, que dice mamá que volvas'

Xuan Santori va acompañar al autor d'esta obra ganadora del I Premio Ría del Eo de Poesía en Galego-asturiano, correspondiente al añu 2021.

La Librería Matadero Uno va acoyer esta tarde la última de les presentaciones de 'Oi, que dice mamá que volvas' (Impronta), poemariu billingüe con traducción al inglés de Jacob Rogers. Nestos meses últimos el de Bual treslladóse a delles poblaciones de dientro y fuera del país, como A Veiga, Santiago de Compostela o Barcelona, pa dar a conocer la so creación lliteraria, xira que fina n'Uviéu.

Pa esta cita última, Rodríguez Monteavaro, que ta acabante de tornar de Ḥélsinki, onde participó nel 'Congreso Internacional de Lingúística Iberorrománica de Finlandia' presentando'l so importante trabayu 'Estudiu llingüísticu nel centru-occidente (ELCOA)' (Trabe), un atles dialeutográficu, va contar cola compañía de Santori, escritor col que va entamar un alderique sobre'l poemariu, llingües y poétiques modernes. La hora d'entamu del actu ta programada pa les 19 hores.

Na semeya, l'alcalde d'A Veiga, César Álvarez Fernández; Rodríguez Monteavaro; y el direutor xeneral d'Aición Cultural y Normalización Llingüística, Antón García, na primer presentación de 'Oi, que dice mamá que volvas' celebrada nel Conceyu que patrocina'l Premio Ría del Eo de Poesía en Galego-asturiano en collaboración col Gobiernu.