Resucita la pantasma de Ciudá Astur

El Gobiernu quier organizar l'área central del país al traviés d'un consorciu qu'axunte a 29 conceyos. Busca asina recuperar el proyeutu de la Ciudá Astur, zona qu'ocupa'l 29 por cientu de la superficie d'Asturies y na que vive'l 80 por cientu de la población.

Los executivos de Vicente Álvarez Areces yá tantiaron esta posibilidá nel pasáu qu'agora torna a trabayar Javier Fernández. El presidente propón nun borrador siete afalamientos pa ordenar l'área central y convertila nuna gran ciudá de sevicios integraos, ente los que destaca llendar la creación d'urbanizaciones, potenciar l'usu del tresporte ferroviariu o negar la creación de más superficies comerciales.

Con esta idea, Fernández pretende "da-y al nuesu espaciu metropolitanu l'emburrie  necesariu para qu'Asturies encare y supere desafíos nuevos", pa lo que pretende xunir a conceyos y Gobiernu nun Consorciu Metropolitanu. Podemos y Foro yá espresaron la so disconformidá col proyeutu. Los primeros señalen que "llega diez años tarde"  y qu'escaez les zones rurales y les ales, mentes que los foristes táchenla de "ocurrencia" pa "distraer de los grandes problemes d'Asturies".