Responsables de política llingüística de la Comunitat Valenciana, Euskadi y Galicia, nel seminariu ‘Oficialidá’

Iniciativa pol Asturianu ta acabante de confirmar el programa definitivu del III Seminariu ‘Oficialidá, el camín constitucional pal futuru del asturianu’, que se va centrar en 'Modelos de normalización y tresmisión xeneracional'. Los responsables de política llingüística de la Comunitat Valenciana, Euskadi y Galicia van acudir a Uviéu pa dar una visión del procesu d’oficialidá nel so territoriu na cita prevista los díes 21 y 22.

Los trés van centrar la primer xornada na Aula Magna del Edificiu Históricu de la Universidá d’Uviéu, que va tener llugar el vienres 21 a partir de les 16.30 hores. Primero va inaugurar el seminariu’l rector, Ignacio Villaverde, en compañía de Iván Llera y Claudia Elena Menéndez, presidente y vicepresidenta d’Iniciativa pol Asturianu, pa depués dar pasu al abogáu Nicolás Bartolomé, responsable de la compilación ‘Derechu llingüísticu del Principáu d’Asturies. Normativa y xurisprudencia’, cola conferencia ‘Los modelos d’oficialidá de les llingües d’España. Opciones pal consensu constitucional’.

A les 17.30 hores Inaciu Galán va conducir el bloque ‘Esperiencies, buscando un modelu propiu p’Asturies’ coles intervenciones de los trés convidaos. Rubén Trenzano, direutor xeneral de Política Lingüística i Gestió del Multilingüisme, va falar de ‘Oficialidá y política llingüística na Comunidá Valenciana’, mesmu tema que va tocar darréu Miren Dobaran, viceconseyera d’Hizkuntza Politikarako, y, depués, Valentín García Gómez, secretario xeral de Política Lingüística, sobre los sos territorios.

Caún va disponer de 45 minutos pa esponer el modelu d’oficialidá y polítiques desendolcaes en cada auotonomía, gobernaes por partíos de diferente color políticu. Pa finar, los presentes van poder participar nuna ronda d’entrugues.

Programes eleutorales y recuperación del Colectivu Manuel Fernández de Castro

El sábadu l’actividá va principar a les 10 hores con una conferencia del recién nomáu académicu, David Guardado, sobre ‘¿Cuándo, cómo, quién y por qué cambió’l discursu sobre l’asturianu? Una marxinación ideolóxica’. Jennifer Berroca va presentar esta intervención y la siguiente, de Fernando Padilla, maestru, pedagogu y direutor de Planificación y Normalización Llingüística na llexislatura anterior, que s’entitula ‘40 años col asturianu na escuela. Llogros, retos y asignatures pendientes’.

Llueu d’una posa, va estrenase a les 11.30 hores el documental ‘De güeles a nietes. El retu de la tresmisión xeneracional del asturianu’, pa siguir al meudía cola mesa de diálogu ‘¿Cómo sedría una Asturies con oficialidá’ con Xosé Antón González Riaño, presidente de l’Academia de la Llingua Asturiana, y la periodista Pilar Rubiera. Va pesllar la mañana la mesa redonda ‘Conociendo los programes electorales. Modelos d’oficialidá y normalización’, moderada por Llera, cola presencia de representantes de partíos que lleven la oficialidá ente los sos compromisos de cara al 28-M.

La Pumarada va acoyer la espicha oficial del seminariu a les 14 hores, con un costu de 35 euros, de 25 p’asociaos. A les 16 hores va retomase l’actividá cola presentación de la recuperación del Colectivu Manuel Fernández de Castro, asociación de gran importancia na traducción de testos relixosos al idioma y la so presencia na Ilesia asturiana, a cargu del sacerdote Luis Traviesas, presidente del mesmu, intervención que va presentar Xuan Pandiella.

Sara Rato va conducir depués una presentación esprés d’empreses qu’usen l’asturianu, pa finar el seminariu con una mesa entitulada ‘¿Cómo ye, bro? Nueves perspectives na normalización del asturianu?’ cola presencia de Xicu Ariza (Musicasturiana.com y Puru Remangu), Blanca Fernández (escritora y youtuber en PlayPresta), Lucía Miravalles (Ringo Rango) y Félix Fernández (Acuto Xuegos). A les 18.45 hores va celebrase’l pieslle y va lleese un manifiestu.

Inscripción abierta

Anque l’asistencia al III Seminariu ‘Oficialidá, el camín constitucional pal futuru del asturianu’ ye llibre, Iniciativa pol Asturianu recomienda la inscripción previa, yá qu’estes persones van tener prioridá d’accesu. Pue formalizase rellenando esti formulariu.

Na imaxe, Trenzano, Dobaran y García Gómez.