El III Seminariu 'Oficialidá' va centrase en 'Modelos de normalización y tresmisión xeneracional'

Iniciativa pol Asturianu ta acabante d'abrir la inscripción pa la cita del 21 y 22 d'abril.

 'Modelos de normalización y tresmisión xeneracional' ye la temática concreta sobre la que va xirar el III Seminariu ‘Oficialidá, el camín constitucional pal futuru del asturianu’. La organización va contar con, ente otros convidaos, responsables de política llingüística d’otros territorios que van dar a conocer modelos d’oficialidá y aiciones de normalización llingüística puestes en marcha por estes alministraciones.

La intención principal d'Iniciativa pol Asturianu nesti tercer seminariu ye plantegar modelos d’oficialidá y de consensu, y conocer otres realidaes d’otres autonomíes. Tamién analizar la situación actual y ver les coses pendientes, afondando na necesaria declaración d’oficialidá y el so desendolcu, asina como de polítiques de normalización; nesi sen, considera fundamental un Plan de Normalización dende l’entamu de la llexislatura próxima que permita desarrollar al máximu la Llei de Promoción y Usu del Bable/asturiano.

L'Edificiu Históricu de la Universidá d'Uviéu va acoyer esta cita'l vienres 21, de 16 a 20 hores, y el sábadu 22, de 10 a 19 hores, ampliando asina l'horariu de la mesma, yá que se venía celebrando de vienres tarde y sábadu pela mañana. L'asistencia ye de baldre, pero ye necesario inscribise rellenando esti formulariu.

La xente interesao en contar con un diploma que certifique la presencia nel seminariu ha pagar 10 euros, a esceición de los socios d'Iniciativa pol Asturianu, que lu pueden algamar de baldre. Otra manera, pal sábadu a les 14 hores ta programada una espicha na sidrería de Pumarada con un costu de 35 euros, de 25 p'asociaos.

Na semeya, asistentes a una de les intervenciones de la pasada edición del seminariu, nel 2019.