“Ye’l momentu d’entamar a falar de qué oficialidá queremos n’Asturies”, asegura Llera

El vienres y el sábadu va celebrase na Aula Magna del Edificiu Históricu de la Universidá d’Uviéu’l III Seminariu ‘Oficialidá, el camín constitucional pal futuru del asturianu’, centráu en 'Modelos de normalización y tresmisión xeneracional'. “Ye’l momentu d’entamar a falar de qué oficialidá queremos n’Asturies”, aseguró Iván Llera, presidente d’Iniciativa pol Asturianu na presentación de la cita.

En compañía d’Inaciu Galán, responsable de la programación del seminariu, intervieno na sala de profesores de la plaza universitaria nuna convocatoria pa dar a conocer en rueda de prensa tolos conteníos del seminariu, qu’amplía les sos dos sesiones habituales –vienres pela tarde y sábadu pela mañana– a otra vespertina na segunda xornada. La última foi nel 2019 y, depués de que pasaran los peores momentos de la pandemia, “agora pensamos que yera’l momentu de volver a xuntanos pa falar al rodiu del fururu del asturianu”, señaló.

“Esta tercer edición del seminariu va tar dedicada a falar de los modelos de normalización y la tresmisión xeneracional”, siguió Llera, qu’entiende que “ye’l momentu d’entamar a falar de qué oficialidá queremos n’Asturies”. “Fálase muncho y compárase muncho con otros territorios; n’Asturies llevamos una situación de desventaya, llegamos más tarde, pero esto tamién ye una oportunidá de deprender qué se fixo n’otros territorios p’atopar un modelu que respuenda a la realidá sociollingüística y les necesidaes que tien Asturies nesti momentu”, afirmó’l periodista.

Dende Iniciativa pol Asturianu “entendemos que col programa que presentamos güei vamos poder contribuyir a esi alderique”. Un programa qu’enumeró Galán, poniendo un énfasis especial na presencia de Miren Dobaran, viceconseyera d’Hizkuntza Politikarako, y los responsabes de política llingüística de la Comunitat Valencia, Rubén Trenzano, y Galicia, Valentín García Gómez.

“Va ser una mesa de trés ponentes” –vienres a les 17.30 hores baxo’l nome ‘Esperiencies, buscando un modelu propiu p’Asturies’– de gobiernos de diferentes partíos col que la organización pretende amosar “les distintes maneres qu’hai. La Constitución marca la idea de la oficialidá, pero depués cada Estatutu y cada llei de normalización xenera distintos modelos. Nosotros tenemos que buscar un modelu propiu p’Asturies y tenemos que buscalu n’otres esperiencias y tamién na propia esperiencia”.

Nesi sen, el tamién periodista apuntó que “quiciás el llugar que más se paez a Asturies en munches coses sociollingüístiques seya Galicia, pero tamién hai otres cuestiones que nos podíen interesar n’otros territorios. Paecíanos mui interesante conocer la esperencia yá de causi 45 años d’oficialidá n’otros territorios y mui positivo que vinieren equí a Asturies a contanos qué tán faciendo y qué soluciones afayadices podemos atopar n’Asturies”.

Presencia de partíos políticos

La otra mesa destacada por Galán ye la que va tener llugar el sábadu a les 13 hores, entitulada ‘Conociendo los programes electorales. Modelos d’oficialidá y normalización’ y moderada por Llera, que va contar cola presencia de representantes de partíos que lleven la oficialidá ente los sos compromisos de cara al 28-M. “Convidámoslos pa qu’entamen a concretanos cuál ye la visión que tienen ellos d’una Asturies con oficialidá”, esplicó Llera.

Les conferencies de Nicolás Bartolomé, entitulada ‘Los modelos d’oficialidá de les llingües d’España. Opciones pal consensu constitucional’, o de David Guardado na que va esplicar “por qué l’asturianu llegó a la situación na que ta, sobre too contándonos lo qu’ocurrió nel sieglu XIX y cómo cambió’l discursu del asturianu nun momentu nel que taba al empar que’l restu de les llingües”; la estrena del documental ‘De güeles a nietes; o la presencia d’empreses qu’usen l’asturianu nel so día a día son dalgunes otres importantes intervenciones del seminariu, que va inaugurar el rector Ignacio Villaverde.

Nesta información asoleyada previamente n’Asturies.com va poder consultar la totalidá del programa. La entrada a toles actividaes ye de baldre, pero Iniciativa pol Asturianu recomienda la inscripción previa, yá qu’estes persones van tener prioridá d’accesu.

Pue formalizase la matrícula rellenando esti formulariu.

Na semeya, Llera y Galán.