Primer alcuentru pa desbloquiar la reforma del Estatutu: les cuatro fuercies coinciden n’entainar col procesu

Esta mañana tuvo llugar el primer aconceyamientu ente les cuatro fuercies polítiques favoratibles a la reforma del Estatutu d’Autonomía qu’incluya la oficialidá. Colos trés quintos y modificaciones fiscales sobre la mesa como puntu d’entamu de la negociación, tolos partíos coincidieron n’entainar col procesu.

La Federación Socialista Asturiana (FSA) tuvo representada nel alcuentru por Gimena Llamedo y Noelia Macías, mentes que por Podemos acudió Daniel Ripa y Rafael Palacios, Víctor Suárez y Alejandro Suárez por Izquierda Xunida (IX), y Adrián Pumares por Foro. Una cita que dexaba atrás dos meses de paralización depués del primer alcuentru informal a cuatro celebráu llueu de conocer les condiciones puestes por Foro pa sofitar la oficialidá del asturianu y el gallego-asturiano.

La necesidá de trés quintos p’aprobar y modificar nun futuru la llei de normalización que desendolque dicha oficialidá y dellos aspeutos fiscales, como la bonificación del impuestu de socesiones hasta la cantidá d'un millón d’euros, punxéronse otra vegada sobre la mesa esta mañana como los dos puntos de salida pa desbloquiar la negociación. Ensin alcuerdu ente les partes de momentu, sí hebo compromisu de los cuatro patíos pa dar velocidá al procesu y amosóse voluntá de llegar a un alcuerdu.

Nun se concretó fecha pal próximu aconceyamientu, pero esti mes va ser clave pa contar con una propuesta de reforma que pueda cumplir colos plazos y aprobase esta mesma llexislatura na Xunta Xeneral y nes Cortes españoles. Nesi sen, IX insiste col 1 de febreru como fecha llende pa contar col testu alcordáu.

Na semeya, les socialistes Macías y Llamedo nel aconceyamientu d'esta mañana na Xunta Xeneral.