L’artículu 4 nun ye’l problema pa la reforma estatutaria

La segunda xunta celebrada pa desbloquiar les negociaciones pa la reforma del Estatutu dexó delles propuestes sobre la mesa, como una redaición concreta del artículu 4 cola oficialidá fecha pola FSA a partir de les demandes de toles formaciones. Foro considera positivu esti movimientu, cuestión que nun va ser problema pa un pautu, asina como’l d’IX, pero nun ve muncha voluntá d’alcuerdu nel tema fiscal.

La formación clave pa sumar el votu 27 que permita aprobar la reforma estatutaria insiste n’entamar un fonda reforma nel país, na que la norma autonómica ye una parte fundamental, pero non la única. La eliminación de facto del “impuestu de socesiones, bonificándolu hasta la llende d'un millón d'euros”, como espuso Adrián Pumares na Xunta Xeneral n’ochobre col enfotu de “dexar de tener un sistema fiscal que constitúi un agraviu sangrín coles comunidades del nuesu entornu”, ye la demanda principal de Foro qu’impide de momentu un alcuerdu énte la posición contraria nesi sen d’IX y Podemos, cola coalición dexando nidia la so postura esta mañana a la salida del aconceyamientu.

La Federación Socialista Asturiana (FSA-PSOE) yá amosara tamién la so posisición, que ye qu’esista un alcuerdu ente les trés formaciones d’izquierdes nesi sen pa dar el pasu de tocar la fiscalidá. Foro, pela so parte, nun ve voluntá, sobre manera n’IX, en llegar a un alcuerdu nesti tema.

Por contra, sí celebra la esistencia de propuestes concretes sobre la mesa, tanto d’IX sobre los doce puntos, como del artículu 4, que nun va suponer problema nengún ente los cuatro grupos una vez aceptada la demanda de los trés quintos p’aprobar o modificar la Llei d’Usu que desendolque la oficialidá del asturianu y gallego-asturiano, que pasa a nomase nel testu eonaviego. Asina, namái la fiscalidá queda como problema p’avanzar nun procesu nel qu’IX y Podemos insisten colos curtios plazos, con Foro nun dando importancia a les feches convencida de qu’hai llexislatura per delantre.

Optimismu en Podemos

Pela so parte, Rafael Palacios, qu’acudió nesta ocasión cola secretaria xeneral nueva de Podemos, Sofía Castañón, en sustitución de Daniel Ripa, amosó la so satisfaición pol compromisu d’entamar aconceyamientos periódicos, al menos ún selmanal, y pola redaición del artículu 4 propuestu “que va permitir avanzar n’aspeutos concretos de la reforma estatutaria”. La formación morada va preparar tamién un informe nel que va analizar los doce puntos demandaos por Foro “que permita superar esta situación de bloquéu” pa que s’apruebe la norma “los más pronto posible”.

Dende la FSA recordaron qu’entovía falta’l votu númberu 27 pa proceder a la reforma estatutaria y señalen que la propuesta del artículu 4 pretende siguir avanzando en busca d’un alcuerdu que necesita, primero, salvar el problema de la fiscalidá. Fontes socialistes afirmen que, magar nun tar nes negociaciones, el presidente Adrián Barbón ta siguiendo mui de cerca les negociaciones ente les cuatro fuercies favoratibles.

Na imaxe, testu del BOE del 1982 nel que s'aprueba l'Estatutu d'Autonomía. L'artículu 4 modificaríase nel 1999 pa incorporar que "una llei del Principáu regulará la proteición, usu y promoción del bable".