IX acepta’l 75 por cientu de les esixencies de Foro pa la reforma del Estatutu, pero non socesiones

Alejandro Suárez, secretariu d’Estratexa Política d’Izquierda Xunida (IX), anunció esti vienres que la formación acepta’l 75 por cientu de les esixencies de Foro pa qu’Adrián Pumares sume’l votu 27 que permita la reforma del Estatutu qu’incluya la oficialidá, con diferencies entá en socesiones. La propuesta de desbloquéu de la negociación respuende a les 12 reclamaciones feches pol partíu asturianu.

“Vamos contesta-y a les 12, una por una, y vamos ver el nivel d’alcuerdu que pue haber, que nós ciframos al rodiu d’un 75 por cientu de les propuestes que yá nos unvió Foro. Poro, creemos qu’esi ye un bon plantegamientu pa la direición de Foro, que sepa qu’IX ta dispuesta a aceptar trés cuartes partes de toles propuestes que nos punxeron enriba la mesa, dende’l mediu rural, una llei de l’Asturies Vaciada, demografía, infraestructures, etc. Inclusive propuestes de fiscalidá diferenciada que yá aceptamos nos presupuestos últimos d’ayudes a la natalidá”, espuso Suárez.

La torga, una vegada aceptaos los trés quintos p'aprobar o modificar la Llei de Normalización que desendolque la oficialidá, torna a tar en socesiones, una de les principales reclamaciones del partíu de Pumares, que tampoco agrada a FSA y Podemos. “Siempre fuimos claros: la fiscalidá ye parte del ADN d’IX, forma parte del nuesu nucleu más importante programáticu”, asegura’l secretariu d’Estratexa Política, que recuerda que la so formación ta renunciando a “elementos fundamentales pa nós, como ye la reforma de la Llei Eleutoral o como ye’l blindaxe de los derechos sociales”.

“Tamos viniendo a esta reforma ensin condicionantes; sicasí, los condicionantes de Foro Asturias vamos analizalos y vamos face-yos una propuesta de desbloquéu de la situación. Nun ye bono enrocase y nun ye bono bloquiar porque non toles tos propuestes sían aceptaes”, añade.

Por último, Suárez calcó na necesaria “flexibidá por toles partes”. “Yo si fuera un negociador de Foro diría que ye un ésitu negociador: oiga, fui con 100 propuestes y aceptaron 75”, finó.

Na semeya, los representantes d'IX, Alejandro Suárez y Víctor Suárez, asitiaos onde les ventanes, con Pumares enfrente, nel segundu aconceyamientu d'esti mes celebráu esta mañana.