“Prestaríanos qu’esta sala fuese un llugar d’alcuentru del asturianismu cultural”, espresa Rubiera

La Fundación Almastur, impulsada pola familia de Carlos Rubiera, da un pasu más na so etapa de puesta en marcha col acondicionamientu d’un espaciu con un aforu de 40 persones en Caldones que va inaugurase esti vienres con un actu íntimu. “Prestaríanos qu’esta sala fuese un llugar d’alcuentru del asturianismu cultural”, afirma’l cantante.

Con un añu de vida y una actividá mayormente interna nesti tiempu, saliendo al espaciu públicu en febreru cola presentación d’un conveniu de collaboración con Iniciativa pol Asturianu que lleva, ente otres coses, l’entamu de la Xira pola Oficialidá que visitó Bimenes na primavera y que va tener el mes viniente la so parada siguiente en Samartín del Rei Aurelio, naz col oxetivu del “estudiu, la defensa, la divulgación de la cultura asturiana en tolos sos ámbitos y manifestaciones, tanto tradicionales como en nueva creación”.

Un proyeutu de calter familiar que va tener espaciu xunto a la casa del propiu Rubiera en Caldones. Ehí, enriba del llagar y no que yera un desván, acondicionó una sala con un aforu de 40 persones p’acoyer actividaes, llocal cedíu de baldre por 10 años, renovables, a la fundación.

“Foi una obra potente na qu’invertimos una parte del dineru de la fundación y tamién dineru de la familia, amás de munches hores de trabayu, de los mios fíos, pero fundamentamente míes”, esplica Rubiera, que contó cola ayuda de José Miguel Feito, vecín y profesional de la construcción, al que se contrató pa la obra. “Fixímoslo too menos la instalación eléctrica: carpintería, albañilería, fontanería incluso...”, rellata Rubiera, que calcula en más 1.000 hores les dedicaes “nesta segunda fase, ensin contar el reteyáu y otros llabores previos”.

El resultáu son “70 metros útiles de sala más los almacenes llaterales, que tienen muncha utilidá”, nun espaciu completu de “114 metros”. “Nesti momentu tengo 40 silles, anque un poco apetiguñaos podríen entrar unes persones más, pero creo que 40 ye un aforu mui guapu p’actos de pequeñu formatu lliterario-musicales, charres, debates, etc.”, añade.

“Prestaríanos qu’esta sala fuese un poco un llugar d’alcuentru del asturianismu cultural”, asegura Rubiera darréu, recordando que los estatutos de la Fundación Almastur afiten como ún de los sos oxetivos “abrir estos llocales a otres entidaes, yá sían públiques o privaes”. Nesti puntu esplica que’l conveniu con Iniciativa pol Asturianu, amás de la cuestión de la Xira pola Oficialidá, “básase nun intercambiu mui simple: yo cedo la sala p’actividaes propies que puedan entamar y Iniciativa difunde les actividaes de la fundación al traviés de la so rede de socios, que son munchos”, un tipu de collaboración que-y gustaría “abrir con otres entidaes asemeyaes nel ámbitu del asturianismu cultural y llingüísticu”.

Esta tarde, sobre les 19.30 hores, va tener llugar un actu íntimu, que va servir d’inauguración oficial d’esti espaciu, al que van asistir unes trenta persones, “familiares y amigos del ámbitu de la música y del asturianismu”. Nel mesmu va haber un intermediu musical d’unos 30 minutos nel que cantará Mariluz Cristóbal y el propiu Rubiera col acompañamientu de l’acordionista María Álvarez Santiago.

Taller de talla de madera tradicional

La sala nun ye l’únicu llugar cedíu pola familia Rubiera a la Fundación Almastur. Tamién el llagar, nesti casu con usu compartíu, la casa de nacencia de Carlos, asitiada en frente, el güertu o unos aparcaderos que se tán habilitando pa unos 30 coches.

Sol horru tamién va afayase un espaciu onde va desenvolvese la primera de les actividaes previstes, un taller de talla de madera tradicional que va impartir el presidente del Patronatu cola posible ayuda del so fíu Andrín, que tien el cargu de vicepresidente. L’órganu de gobiernu de la entidá complétase col so otru descendiente, Enol, como secretariu, y cola so madre, de 92 años, Purificación Tuya, como vocal.

La intención ye qu’arranque en payares con turnos de 5 persones, los que podríen trabayar al empar baxo la construcción, anque “a futuru, si les coses van mínimamente bien, querría habilitar na casa vieya un taller con lluz cenital pa cuestiones como la madera, la talla… Pa trabayos de precisión, como podría ser tamién l’acebachería”. Porque “el gran oxetivu de la Fundación Almastur ye crear progresivamente un proyectu que tengo na cabeza, y nel papel, va bastante años, igual más de 10: una Escuela de la Cultura Asturiana”, asegura.

Al respeuto, apunta que “nun se trata d’anunciar ‘empiecen les actividaes de la Escuela de la Cultura Asturiana’, non, les propies actividaes de la Fundación Almastur van empobinaes nesi sentíu”. En proyeutu, entovía ensin zarrar, hai otres munches idees, como l’entamu nel primer trimestre del añu qu’entra d’unes xornaes pa profesionales de l’arquiteutura del ámbitu de la restauración de cases o construcciones na zona rural asturiana, baxo la direición de Xuan Pedrayes y probablemente la collaboración d’Ástur Paredes, “pa dar información amplia y fidedigna a esta xente sobre tipoloxíes de cases tradicionales, materiales d’usu tradicional, ónde se puede atopar, canteres, serreríes…, pa que tengan una documentación amplia y de primer mano que-yos permita ser mui rigurosos y al mesmu tiempu facer coses mui guapes nel so ámbitu de trabayu”.

Rubiera tamién ta en conversaciones con Eduardo García Salueña, responsable del Taller de Músicos de la Fundación Municipal de Cultura, Educación y Universidá Popular de Xixón, pa un posible ciclu del tema de l’asturianada. “Too ello va configurando una especie d’Escuela de la Cultura Asturiana”, especifica’l cantante, que nun escaez una fecha importante que se celebra l’añu qu’entra, los 50 años de Conceyu Bable, polo que va programar un ciclu relativu nel últimu tremestre del 2024: “Tien que ser un momentu de xuntura, de puesta en valor de lo que se fixo, pero tamién, y sobre too, de garrar un nuevu impulsu pa lo que queda por facer, que ye muncho. Un momentu pa que l’asturianismu cultural s’axunte, debata y celebre tolo que consiguió y planifique’l futuru”.

Por último, apunta’l so deseu d’entamar, “pa tiempu de primavera-branu, un ciclu lliterariu-musical con un esquema que sería un escritor asturianu relevante pa que presentara la so obra y recitara xunto con una persona que lu fora entrevistando” y l’acompañamientu d’interludios musicales por parte del propiu Rubiera, cola intención inclusive de grabalos y ufrilos a TPA. “Son proyeutos maduros na cabeza, pero non zarraos”, comenta’l cantante sobre estes sesiones de diferente temática que s’acompañaríen con una espicha nel llagar que sirva de xuntanza ente participantes y asistentes.

Trabayar n’andecha

“Lo que va dar realmente vida a la fundación, y ta marcao nos estatutos, ye’l fechu de que seamos capaces d’afitar bona rellación con otres entidaes que trabayen nel ámbitu cultural, cada cual nel so ámbitu, con absolutu respetu a la vida social de caún, al igual que facíen nes caseríes antiguamente. Esti espíritu de l’andecha que yo viví de neñu prestaríame muncho poder revitalizalu nesti ámbitu, teniendo esti espaciu y poniéndolu a disposición d’otres entidaes pa que puedan desendolcar coses o dendolcales de manera conxunta”, rescampla’l presidente del Patronatu.

En definitiva convertir a la Fundación Almastur “nun llugar d’alcuentru del ámbitu de la cultura y de la llingua asturiana y al mesmu tiempu dinamizar, axuntar a la xente que ta trabayando, y xenerar trabayos, idees y iniciatives a comuña. Y por supuesto, que’l retu de la Escuela de la Cultura Asturiana sía una realidá operativa y permanente, con una actividá regular, con vida siempre”.

Na semeya superior, Rubiera posa na sala acondicionada, con un pianu propiedá de la Fundación Almastur, al fondu. Na inferior, l'espaciu dende l'esterior.