La configuración de la Escuela de la Cultura Asturiana empecipia con un cursu de talla tradicional en madera

La Fundación Almastar abrió’l plazu d’inscripción pal cursu de talla tradicional en madera, que va tener llugar nes sos instalaciones en Caldones de la segunda metá de payares a lo primero de xunu. Esta actividá ye la primera de la organización, cola que s’entama a encadarmar la Escuela de Cultura Asturiana, el so gran oxetivu.

Una vegada rematada la obra de la Sala Almastur, l’acondicionamientu d’un desván de la familia Rubiera como salón multiusos pa un aforu d’una 40 persones, la Fundación arranca cola so actividá. La primera va ser un taller tradicional en madera que va proporcionar a los asistentes “conocimientu de les distintes tribes de madera, nociones básiques de dibuxu xeométricu pa la preparación de los motivos, el conocimientu les ferramientes y el so afiláu, ansina como la práctica de taller”.

El cursu va ponelu Carlos Rubiera sol horru de les instalaciones en Garbelles de Baxo en grupos reducíos, d’ente 5 y 8 persones, en sesiones presenciales de 2 hores en díes alternos (llunes-miércoles y martes-xueves), ufiertándose diverses posibilidaes d’horariu. Al final d’estos cuasi siete meses de docencia, va esponeses una esbilla de trabayos fechos polos alumnos na Sala Almastur y va entamase una espicha con participantes y allegaos nel Llagar de Garbelles.

La xente interesao n’apuntase han ponese en contautu cola Fundación Almastur nel teléfonu 985.13.86.48., con plazu máximu pa formalizar la matrícula’l 10 de payares. Les socies y socios d’Inciativa pol Asturianu cuenten con un 20 por cientu de descuentu por mor del conveniu de collaboración ente les dos organizaciones.

Esti cursu de taller tradicional en madera ye la primera de les actividaes que van dir encadarmando la Escuela de Cultura Asturiana nes instalaciones d’esta iniciativa de la familia Rubiera xunto a la casa familiar en Garbelles de Baxo col oxetivu de que sía “una realidá operativa y permanente, con una actividá regular, con vida siempre”, apuntaba Carlos a Asturies.com el mes pasáu.

Na imaxe, una talla en madera.