La Xira pola Oficialidá va percorrer los conceyos “en defensa de la llingua asturiana y d’esti derechu constitucional”

La movilización cívica Xira pola Oficialidá, impulsada pola Fundación Almastur y Iniciativa pol Asturianu, y abierta a tola ciudadanía y entidaes “con una sensibilidá asturianista y democrática”, va percorrer los conceyos del país y otres autonomíes con idioma propiu “en defensa de la llingua asturiana y del derechu constitucional que ye la oficialidá”. Carlos Rubiera y Iván Llera roblaron un conveniu de collaboración.

L’actu fíxose nel Atenéu Obreru de Xixón, al qu’agradecieron la cesión del espaciu. “Llevamos conversando y falando dende la seronda cola intención de collaborar ente les dos organizaciones de manera formal y continuada nel tiempu y a lo llargo d’estos meses vinimos madurando esta decisión de trabayar conxuntamente, una collaboración que tuvimos concretando nun conveniu nel que ponemos en común esi interés por trabayar en defensa y pol futuru de la llingua y cultura asturianes, que ye l’enfotu que tenemos en común les dos organizaciones”, apuntó nun primer momentu Llera, presidente d’Iniciativa pol Asturianu.

Rubiera, presidente del Patronatu de la Fundación Almastur, amosó depués la so gratitú con Iniciativa pol Asturianu “por acoyer, con tol interés del mundu y con tola capacidá organizativa que tien esta entidá modélica, una idea que surdió na mio cabeza va un añu práuticamente, depués del frustráu intentu de reforma del Estatutu d’Autonomía y que comenté per primera vez con dalguien esternu a min mesmu a Inaciu Galán nel Día de les Lletres Asturianes. A partir d’ehí comencemos a tener conversaciones y llueu yá conceyos más formales na seronda qu’afortunadamente acabaron concretándose nesti conveniu y nesta iniciativa de Xira pola Oficialidá que pondremos en marcha yá”, con marzu como primer previsión.

El conveniu concrétase “nuna rellación estrecha de confianza y collaboración na que la Fundación Almastur ofreznos los medios que tien na so disposición y nosotros, dende Iniciativa pol Asturianu, quedamos a disposición d’ellos pa difundir l’actividá que va desarrollar bien llueu y llegar al mayor númberu posible de xente”. Una collaboración “con un oxetivu mui claru que se va concretar na primer actuación que vamos desarrollar conxuntamente”, la citada Xira pola Oficialidá, que se define nun manifiestu conxuntu.

El testu

Ésti “rescampla la necesidá d’articular una gran movilización social pa desixir a los poderes políticos –partíos ya instituciones– el cumplimientu de lo que ye un derechu irrenunciable, individual y coleutivu, recoyíu espresamente na Constitución española en vigor (Preámbulu Xeneral, Art. 3.2, Art- 14); asina como na Carta Europea de les Llingües Rexonales y Minoritaries y, mesmo, na declaración Universal de los Drechos Humanos, aprobada pola Asamblea Xeneral de les Naciones Xuníes nel 1948 en París”, como ye la “plena oficialidá pal asturianu y l’enaviegu nel so ámbitu territorial”. “Conscientes d’esa necesidá”, les dos entidaes “asumen la responsabilidá d’entamar y empobinar esa gran movilización cívica; y faen un llamamientu al conxuntu de la sociedá pa qu s’axunte nesta andecha fondamente democrática y esencial”.

Con esi enfotu entamen “col nome de Xira pola Oficialidá esta movilización cívica que va percorrer los conceyos d’Asturies nos próximos meses; y aguarde una rempuesta masiva y solidaria del conxuntu la sociedá asturiana y de les otres comunidaes pa que na, próxima llexislatura, se faiga por fin realidá lo que vien siendo una demanda social pacífica, democrática y continuada per más de trés décades: l’asturianu, llingua oficial”. “La Xira pola Oficialidá va ser una movilización ciudadana en defensa de la llingua asturiana y del derechu constitucional que ye la oficialidá, que se concreta con esti manifiestu”, resumía Llera.

Ensin fecha de caducidá

“La xira ta concebida como una iniciativa itinerante y l’esquema de funcionamientu, que va dir variando de conteníos a midida que vayamos desendolcándola y se vayan incorporando persones y otres entidaes –nun pretendemos monopolizar esta iniciativa, queremos que sía mui abierta a la sociedá, a los asturianos y asturianes individualmente pero tamién a otros coleutivos y entidaes que trabayen pola llingua y pola cultura asturiana– ellí onde atopemos la collaboración necesaria por parte de les instituciones públiques municipales o d’entidaes ciudadanes, consiste en tar una selmana completa presentes nel llugar”. Esto ye, “en cada conceyu en que llevemos la Xira pola Oficialidá, pretenderíamos tar una selmana” con actividaes de toa mena.

Esposiciones, conferencies, debates, meses redondes, proyeiciones, comentaes y música van conformar la programación “que nun tien fecha de caducidá previsible. Vamos intentar tratar de percorrer los más sitios d’Asturies que se puedan a lo llargo de los próximos meses, pero pue ser de los próximos años dependiendo de les fuerces que tengamos de llevalo alantre y hasta qué puntu nesta llexislatura s’algama l’oxetivu pol que daríamos por concluyida la campaña”, la oficialidá.

Pero la Xira pola Oficialidá nun va quedar namái n’Asturies, yá que dar el saltu a otres comunidaes autónomes con llingua propia –“a Galicia, a Cataluña y al País Vascu como mínimo”– y a Madrid, “porque Asturies necesita dar a conocer tolo que se fixo de bueno y de muncho en toes estes décades; que fuera sepan que tenemos una llingua perfeutamente habilitada pa la vida moderna, una llingua que pue funcionar en plan d’igualdá coles demás llingües oficiales del Estáu y que, polo tanto, ye una absoluta inxusticia y una auténtica anomalía democrática que los asturianos seyan los únicos que nun gocen de los derechos llingüísticos que sí tienen los demás ciudadanos del Estáu español”.

Na semeya, Llera y Rubiera nel momentu de roblar el conveniu.