Podemos presenta propuestes de resolución sobre la reforma del Estatutu y l'asturianu en RTPA

Esti xueves va tener llugar la tercer sesión del Alderique d’Orientación Política Xeneral del añu llexislativu 2022-2023, nel que se van aldericar y votar les propuestes de resolución de los grupos parllamentarios. Podemos presenta un total de 32, entes les qu’hai una sobre la presencia del asturianu y el gallego-asturiano na RTPA y l’encamientu pa rexistrar una reforma del Estatutu qu’incluya la oficialidá.

“Volvemos a presentar una resolución sobre’l tema de la reforma del Estatutu qu’incluya la oficialidá de les llingües propies d’Asturies. Pensamos que yera importante esta resolución porque ye ún de los grandes fracasos del Gobiernu d’Asturies y d’Adrián Barbon y queremos volver a presentala y abrir la posibilidá d’esi alderique”, apuntó Rafael Palacios en rueda de prensa esta mañana.

En concreto, el testu encamienta al Conseyu de Gobiernu a “rexistrar una propuesta de Reforma del Estatutu d’Autonomía del Principáu d’Asturies que contemple, ente otres cuestiones y materies, la oficialidá de les llingües propies d’Asturies”. Nun ye la única que se refier al asturianu y al gallego-asturiano, yá que “tamién plantegamos que s’asegure la presencia de les llingües propies na RTPA”, añadió’l voceru de Podemos.

La resolución presentada pola formación morada llama a “tomar toles midíes necesaries pa garantizar la presencia de les llingües propies d’Asturies na programación de la RTPA, con un tratamiento dignu, global y permanente”. La sesión na que se van votar éstes y les otres propuestes va principiar a les 9 hores de mañana.