Palacios y Barbón crucien acusaciones sobre’l papel de Podemos y de la FSA na negociación de reforma del Estatutu pa la oficialidá

“Vusté tuvo na so mano desbloquiar la situación y nun fixo nada”, dixo-y el voceru de Podemos, Rafael Palacios, al presidente Adrián Barbón, al que acusó de caltener “una posición táutica” con respeuto a la reforma del Estatutu d'Autonomía pa incluyir la oficialidá del asturianu y del gallego-asturiano. “Lo que vustedes queríen yera’l ‘trágala’ de baxar los impuestos a cambiu d’aceptar la reforma”, respondió’l socialista.

Palacios y Barbón protagonizaron el debate más ásperu de los cuatro primeros de la mañana nel Alderique d’Orientación Política Xeneral del añu llexislativu 2022-2023, que vive la so segunda sesión col turnu de los voceros depúes del discursu del llavianés d’ayeri. Foi’l terceru de la mañana, toos en castellanu, depués de la intervención de Teresa Mallada, del Partido Popular (PP), y de Susana Fernández Álvarez, de Ciudadanos, siguiendo darréu Ángela Vallina, d'Asturies pela Izquierda (IX-IAS).

El de Ciañu afeó al presidente que “ún de los principales retos del so mandatu, la reforma estatuaria, acabará siendo ún de los fracasos históricos que pesará na so memoria porque vusté tuvo na so mano desbloquiar la negociación y prefirió nun facer nada”. Nesi sen afirmó que “Podemos Asturies, con aciertos y errores, asumimos les nueses contradicciones pa desbloquiar la negociación y implicámonos, a un altu preciu, na busca d’un consensu que permitiera reformar l’Estatutu y algamar la oficialidá de les nueses llingües propies. La FSA nun presentó nin una sola propuesta pa la reforma del Estatutu, nin una sola propuesta p’aprobar la oficialidá. El Gobiernu limitóse, con sorrisa burllona, a azuzañar ente les formaciones supuestamente partidaries del alcuerdu, ensin proponer ensin liderar y ensin moyase. Convirtiéronse n’observadores non participantes”.

Nesti primer turnu finó esti tema calcando en que “vustedes son los máximos responsables del fracasu históricu de la reforma del Estatutu nesta llexislatura. Vustedes son los responsables de la deceición y la frustración de cientos de miles d’asturianes y asturianos”.

La respuesta de Barbón foi nel mesmu tonu: “Sobre l’Estatutu namái voi dici-y una cosa, pa que quede claro. L’únicu partíu que punxo una propuesta d’artículu 4 enriba la mesa foi la Federación Socalista Asturiana, y l’únicu partíu que fixo aportaciones al artículu 4 foi Izquierda Unida de Asturias. Vustedes nun dixeron esta boca ye de mio sobre l’artículu 4. Dígalo too”.

Y siguió apuntando que “lo que vustedes sí queríen yera’l ‘trágala’ de baxar los impuestos a cambiu d’aceptar un reforma del Estatutu. La FSA díxolo bien claro: sin nun yera alcordáu poles trés fuercies de la izquierda nosotros nun taríamos d’alcuerdu na reforma del Estatutu. Izquierda Unida fixó una posición y nosotros asumímosla. Nun hai más que dicir. Mézclase fiscalidá y estatutu y el tema queda equí”.

Na réplica, Palacios insistió con que “vustedes son los máximos responsables de que nun haya reforma estatutaria” y apuntó que “Podemos Asturies, al traviés del que yera nel so momentu secretariu xeneral (Daniel Ripa), presentaron una propuesta non del artículu 4, una propuesta de reforma del Estatutu, al que vustedes nin siquiera contestaron. Nun contestaron porque nun-yos interesaba, porque quedó claro a lo llargo d’esti procesu que la de so yera un posición táutica”.

Nun entró más nel tema Barbón, qu’apuntó que “voi escaeceme de los 5 minutos d’acusaciones” pa centrase na segunda parte de la intervención de Palacios, enfocáu a los Presupuestos, anque’l voceru de Podemos nel so tercer turnu tornó a citar la propuesta de reforma del so partíu p’afirmar que “al final acabamos nuna suerte de negociación estrambótica pasándonos un papel con cuatro llinies sobre un artíuculu. Un fracasu”.

La necesidá de la reforma

Enantes Palacios apuntara que “necesitamos un nuevu Estatutu d’Autonomía p’Asturies que dote a esta Xunta Xeneral de les atribuciones necesaries que permitan la institucionalización d’un marcu d’autogobiernu con capacidá política y económica propia pa reafirma la nuesa apuesta por un Asturies soberana, que defenda lo público, los derechos humanos y la xusticia social. Un Estatutu nuevu qu’amplíe competencies, que refuerce la entidá política y institucional d’Asturies, construyendo una democracia avanzada, averando el poder y la capacidá de decisión a los ámbitos y les instituciones más inmediates, articulando al empar la participación y el protagonismu de los coleutivos sociales y la ciudadanía. Que defina un modelu qu’asegure l’autonomía y la suficiencia financiera d’Asturies con mecanismos de proteición de los servicios públicos y la reducción de les desigualdaes territoriales. En definitiva, un proyeutu de país qu’Asturies necesita”.

Darréu añadió que “temos que salir del ‘ye lo qu’hai’, de la resignación énte la fatalidá, y rehabilitar l’autoestima de la sociedá asturiana”.

Na imaxe, Palacios y Barbón.