La propuesta sobre la presencia del asturianu en RTPA sal alantre y refúgase la de la reforma estatutaria

Toles fuercies polítiques, sacante Ciudadanos y VOX, cola astención de Pedro Leal y Luis Armando Fernández Bartólome, sofitaron la propuesta de Podemos que pidía garantizar la presencia de les llingües propies na RTPA. La formación morada quedó sola –Adrián Pumares astúvose– na que pidía al Gobiernu una propuesta de reforma del Estatutu.

Podemos presentara 32 propuestes de resolución pal so alderique y votación na tercer sesión del del Alderique d’Orientación Política Xeneral del añu llexislativu 2022-2023, dos d’elles rellacionaes cola cuestión llingüística. La primera encamentaba al Conseyu de Gobiernu a “tomar toles midíes necesaries pa garantizar la presencia de les llingües propies d’Asturies na programación de la RTPA, con un tratamiento dignu, global y permanente”.

Ésta contaría col sofitu de 36 de los 43 votos emitíos gracies al ‘sí’ de la Federación Socialista Asturiana (FSA-PSOE), Partido Popular (PP), Asturies pela Izquierda (IX-IAS) y el diputáu de Foro, Pumares. 5 diputaos decidiéronse pol ‘non’ y hebo 2 astenciones.

39 votos en contra

Nun tendría’l mesmu ésitu la qu’afalaba al Gobiernu a “rexistrar una propuesta de Reforma del Estatutu d’Autonomía del Principáu d’Asturies que contemple, ente otres cuestiones y materies, la oficialidá de les llingües propies d’Asturies”. Tuvo sólo l’apoyu de los 3 parllamentarios de Podemos que votaron, con 39 parllametarios posicionándose en contra y la única astención del diputáu de Pumares.