Podemos entaína col procesu de reforma del Estatutu d'Autonomía

|
Daniel Ripa

Voces dientro del partíu amuesen la so disconformidá a "una aición unillateral nel camín hacia la oficialidá" del asturianu.

El secretariu xeneral de Podemos, Daniel Ripa, presentó esta mañana na Xunta Xeneral al restu de grupos parllamentarios, cola esceición única de VOX, un documentu con propuestes sobre la reforma del Estatutu d'Autonomía, que la formación quier entainar. Ta estructurada en trés bloques, como yá anunciara'l Día d'Asturies en Xixón: aumentu del autogobiernu, incrementu de derechos sociales y oficialidá.

La intención ye que "nos trés meses próximos d'esti añu se creen nel Parllamentu grupos de trabayu al rodiu estos bloques". Nos que se "estime una mayoría suficiente p'aprobar cada una de les midíes necesaries y, nos llugares onde haya mayoría pa poder avanzar", Podemos propón agora votalos nuna fecha bien simbólica: el 25 de mayu.

Asina, coincidendo cola conmemoración de la declaración de soberanía de la Xunta Xeneral nel 1808, la formación morada pretende "un avance d'esti Parllamentu n'autogobiernu, en derechos sociales, n'igualdá y en que nenguna persona sía discriminada n'Asturies pola llingua que fale”. Entrugáu polos sofitos a la oficialidá –son necesarios trés quintos de la Cámara p'aprobar la reforma, esto ye, 27 diputaos–, Ripa aseguro "tar convencíu de que'l día de la votación habrá mayoría parllamentaria, pero pa eso hai qu'entamar col procesu, aldericar muncho, buscar formes d'aplicación nes que pudiera haber cosensu, porque lo ideal nun sería aprobala con 27, sinón con 45".

Respuesta en redes sociales

La postura de Podemos tuvo respuesta dientro del propiu partíu. El diputáu Rafael Palacios, al enterase de la presentación esta mañana del documentu por parte del secretariu xeneral al restu de fuercies parllamentaries, del que tenía desconocimientu, respondió en redes sociales con un mensaxe nel que refuga "cualesquier acción unillateral nel camín a la oficialidá", entendiendo necesario pa dar esti pasu un consensu ente les organizaciones favoratibles a la oficialidá.

Otra diputada de la formación, nesti casu nel Congresu, Sofía Castañón, tamién amosó la mesma postura que'l de Ciañu. Estos posicionamientos tán xenerando un alderique en redes sociales al respeuto d'esta decisión tomada pola direición de Podemos Asturies.

Contador Estadistiques