Podemos propón un calendariu pa la reforma del Estatutu d'Autonomía

Daniel Ripa quier entamar nesti periodu de sesiones una revisión de la norma.

El diputáu y secretariu xeneral de Podemos convidó'l llunes nel Plenu Institucional pol Día d'Asturies a tolos grupos parllamentarios, nun cachu de la so intervención na qu'emplegó l'asturianu, a "sumase a la reforma del Estatutu porque la llingua nun ye patrimoniu de nengún partíu políticu". Una renovación del testu que sirva pa blindar "derechos sociales y llingüísticos", añadió.

Un día depués, nel Día d'Asturies, Ripa propunxo un calendariu pa facer esta modificación de la norma, pa lo que ye necesario trés quintos del Parllamento, esto ye, 27 diputaos. "Ayeri –pol llunes– encamentamos al Partido Socialista a facer esa reforma y güei –pol llunes– plantegamos-yos un calendariu nel que nestos primeros meses d'esti periodu de sesiones nos dediquemos a un estudiu y una actualización del Estatutu d'Autonomía: revisar onde podemos tener el mesmu autogobiernu que cualquier otra comunidá autónoma, porque nun queremos ser más pero tampoco menos que naide, y ver qué derechos sociales podemos blindar, pa que nel siguiente periodu de sesiones impusemos una reforma buscando los máximos alcuerdos", esplicó.

A esti blindaxe de derechos sociales y un mayor autogobiernu, sumaríase la oficialidá del asturianu y gallego-asturiano, "porque lo que ye válido pa València y Galicia ye válido p'Asturies". Ripa aprovechó la ocasión tamién p'amosar el so sofitu a los creadores n'asturianu, "que son fundamentales", y a emponderar la importancia d'esti sector y el papel que pue xuegar pa la reactivación económica.

Na semeya, Ripa na manifestación 'Asturies nun tien rei. Soberanía y República' celebrada ayeri en Xixón pol Día d'Asturies.