La XDLA pide a los partíos que se pongan a trabayar na reforma del Estatutu d'Autonomía

|
Cartelu Xunta Xeneral n'asturianu

"Yá tuvo bien d’aplazamientos y del 'agora nun toca'", afirma'l coleutivu cívicu.

El sábadu, un día depués de la propuesta llanzada por Podemos pa reformar l'Estatutu d'Autonomía al rodiu de trés bloques, ún d'ellos dedicáu a la oficialidá del asturianu y el gallego-asturiano, la Xunta pola Defensa de la Llingua Asturiana (XDLA) asoleyó un comunicáu nel que demanda "a tolos grupos parllamentarios un exerciciu de responsabilidá mínima: que dexen de llau los cálculos partidarios y l’enfrentamientu sectariu, y se pongan a trabayar nuna reforma estatutaria que nun pue esperar más".

Pide a la Federación Socialista Asturiana (FSA-PSOE) que, "por ser el partíu del Gobiernu y amás tener l’únicu grupu parllamentariu col númberu necesariu d’escaños pa entamar un procesu de reforma", que garre la iniciativa, y entiende qu'a los demás partíos-yos "correspuende apurrir propuestes y votos pa llevar esta reforma a bon fin". Pa ello son necesarios trés quintos del Pallamentu, esto ye, 27 diputaos.

"Esta llexislatura, de la que yá pasó un terciu si llega a completar los cuatro años, nun pue convertise n’otra llexislatura fallida. Ye’l momentu de la responsabilidá. Yá tuvo bien d’aplazamientos y del 'agora nun toca'. El movimientu de reivindicación llingüística lleva cuarenta años lluchando y bona parte d’ellos fíxolo con unos apoyos parllamentarios muncho más desfavorables", reclama la XDLA, que recuerda que "lo qu’hai que facer agora n’Asturies fíxose yá va cuatro décades, recién salíos d’una dictadura, nes demás comunidaes autónomes con una llingua propia diferente del castellanu: Galicia, País Vascu, Navarra, Cataluña, Valencia y Baleares".

La organización fina'l comunicáu afirmando que "ye’l momentu de saber si tamos énte la nueva política, o si tamos asistiendo a la vieya representación de siempre con actores más mozos". 

 

Contador Estadistiques