Planificación Llingüística va avalar con un informe xurídicu'l Plan de Carreño

La Direición Xeneral de Planificación Llingüística y Normalización va encargar un informe xurídicu cola fin d'avalar la llegalidá del Plan de Normalización de Carreño. Entiende qu'esti conflictu podría afeutar a otros conceyos.

Una reunión celebrada ayeri n'Uviéu ente los responsables de Planificación Llingüística y una delegación del Conceyu de Carreño encabezada pola alcaldesa Amelia Fernández López y conformada pola conceyala d'Educación, Cultura y Bienestar Social, Cecilia Tascón; el secretariu municipal Fernando Mora; la responsable del Serviciu de Normalización Llingüística de la Mancomunidá del Cabu Peñes, Aránzazu Prado; y Alberto Fidalgo, edil de Somos Carreño, trató sobre la situación provocada pol encamientu de Delegación del Gobienu al Ayuntamientu pa qu'anule l'alcuerdu plenariu qu'aprobó'l Plan de Normalización Llingüística y la forma d'encarar esti asuntu.

PSOE, Somos Carreño y IX –que nun pudo acudir a la reunión– amosaron dende un primer momentu'l so apoyu al Plan aprobáu nel Plenu del  28 de xineru, que reclamó'l grupu municipal del PP énte Delegación de Gobiernu –los populares tamién presentaron un recursu contenciosu-alministrativu nun xulgáu de Xixón–, al entender que nun había base llegal pa la so anulación. Planificación Llingüística ye de la mesma opinión y na so defensa de la posibilidá que da la Llei d'Usu y Promoción del Bable/Asturiana anunció a los representantes del Conceyu de Carreño l'encargu d'un informe xurídicu qu'avale'l so Plan de Normalización Llingüística, asina como del restu de los planes aprobaos por otros ayuntamientos asturianos.

Dos frentes

D'ésti va encargase l'abogáu y académicu Nicolás Bartolomé y va centrase en dos frentes. El primeru, coordináu con Mora, va afondar nel procedimientu formal, dalgo que'l propiu secretariu nun ve difícil salvar con dellos axustes. Mentes, el segundu va enfotase na parte más 'política', la que más sorprendió del informe presentáu pola Direición Xeneral de Coordinación de l'Alministración Periférica del Estáu del Ministeriu de Facienda y Alministraciones Públiques, nel que se basa la decisión de la Delegación.

Madrid afirmaba nél que'l Plan de Normalización igualaba al asturianu a la categoría de llingua oficial y que'l Conceyu de Carreño estralimitaba col mesmu les sos competencies, negando la posibilidá de que los ciudadanos puedan comunicase cola alministración llocal n'asturianu, dalgo que Planificación Llingüística y los responsables municipales entienden que ye una llectura de la Llei d'Usu contraria a la so lletra.

L'informe encargáu, que ta previstu que se termine a finales de la selmana qu'entra, va llevase a la Comisión de Cultura pa depués pasalu a Plenu pol procedimientu d'urxencia y votalu nel convocáu pal día 28. Ésti servirá pa la defensa del Plan de Normalización Llingüística énte Delegación de Gobiernu y nel xulgáu, col convencimientu de que nun haya más torgues pal mesmu.

"Toos a una"

Fidalgo, en declaraciones a Asturies.com, señaló que "l'asuntu ta enfocándose bien" y destacó "la bona voluntá amosada per toles partes", asina como'l convencimientu de los trés grupos municipales a favor de la normalización del idioma de "dir toos a una". "Trátase de defender un derechu y confiamos en que too vaya bien", añadió l'edil de Somos Carreño.