La Delegación del Gobiernu anula'l Plan de Normalización de Carreño

La impugnación per parte de los conceyales del Partido Popular (PP) del alcuerdu plenariu del 28 de xineru que lu aprobaba tien esta repercusión -Alega que son defectos de forma nel procedimientu y la interpretación de que les midíes de promoción nun correspuenden a los conceyos nuna llectura de la Llei d'Usu contraria a la so lletra

L'ausencia de competencies de los conceyos pa facer cooficial al asturianu xunto col castellanu llevara años atrás al Tribunal Superior de Xusticia d'Asturies (TSXA) a anular les diferentes declaraciones d'oficialidá feches dende cerca d'una decena d'ayuntamientos asturianos tres los recursos de la Delegación del Gobiernu estatal n'Asturies, pero l'anulación agora del Plan de Normalización Llingüística de Carreño lleva la situación a un puntu esmoleciente.

Tres consultar al direutor xeneral de Coordinación de l'Alministración Periférica del Estáu del Ministeriu de Facienda y Alministraciones Públiques, y recibir un informe de siete fueyes al respeuto, l'órganu representáu por Gabino de Lorenzo señala que l'alcuerdu plenariu "adolez de de nulidá de plenu derechu por nun tramitase conforme al procedimientu establecíu pa la aprobación d'Ordenances Llocales", sinón por un "actu alministrativu". Sicasí, llueu añade "una estralimitación de la competencia municipal", igualando dicho plan a una oficialidá, como denunciaba'l PP de Carreño.

Los conceyales populares fixeron referencia nel so escritu, en primer llugar, los defeutos de procedimientu, pa depués denunciar l'ausencia "de memoria o estudiu económicu concretu" y, por último, "la inconstitucionalidá del Plan, al contener midíes que doten al bable-asturianu del carauter de llingua cooficial por 'aceptar (pol Ayuntamientu) de mou formal que l'asturianu ye, xunto col castellanu, llingua propia d'usu institucional'".

Un mes pa torgalu

Esti cuestionamientu últimu ye al que dedica más espaciu l'informe de Madrid, qu'entiende que "xunto al establecimientu de midíes de fomentu, estímulu y promoción de la llingua asturiana" el Plan de Normalización Llingüística de Carreño "tamién contién otres de carauter regulatoriu o normativu como por exemplu: el reconocimientu como méritu equiparable con otros na función pública llocal la realización de cursos de llingua asturiana pa l'alministración; o por exemplu la ellaboración d'actes n'asturianu; o aprobar una ordenanza d'usu del asturianu y billingüismu pal Ayuntamientu; o tamién por exemplu, lo que denomina como fomentu de la imaxe corporativa nel usu del asturianu en tola documentación alministrativa, multes, bandos, etc., o la normalización de les intervenciones públiques del alcalde y los conceyales n'asturianu, ente otres".

Señala tamién que'l Plan tien, como corolariu, una declaración institucional qu'asume l'usu normalizáu de la llingua asturiana nel conceyu, lo que pal Estáu "supón que l'Ayuntamientu reconoz la cooficialidá del asturianu xunto cola llingua castellana".

Darréu, fai una interpretación peculiar de la Llei d'Usu y Promoción del Asturianu/Bable, dando namái al Gobiernu d'Asturies la posibilidá de facer "planes específicos" basándose nel puntu 2 del artículu 8 d'esta llei, y escaeciendo de forma sorpredente que la llei nel puntu 1 del Artículu 8 diz lliteralmente que "los ayuntamientos asturianos podrán adoptar les midíes necesaries p'asegurar la efectividá del exerciciu de los derechos llingüísticos qu'esta Llei otorga a los ciudadanos residentes n'Asturies".

Agora l'Ayuntamientu, que recibió una carta fechada'l 18 de marzu, tien un mes p'anular dichu plan, anque lo esperao ye que recurra la decisión.