Piñán anuncia l’ameyoramientu del traductor Eslema

La conseyera de Cultura, Política Llingüística y Turismu, Berta Piñán, compareció esti martes na Comisión de Facienda pa informar a los grupos parllamentarios sobre les cuentes del so departamentu. Anunció partíes pal ameyoramientu del Eslema pal desarrollu d’un traductor en llinia castellanu-asturianu públicu y de baldre.

La escritora va xestionar un presupuestu de 47.250.986 euros, de los que 1.904.630 destínense a la promoción del asturianu. Esta cantidá supón un aumentu de 201.000 euros con respueto a les cuentes actuales, una medra del 11,8 por cientu, que gran parte, como apuntó la conseyera, débese al aumentu del gastu de personal (18,91 por cientu más) “sobre manera pola creación del serviciu nuevu que figura na estructura de la Conseyería de Cultura, Política Llingüística y Turismu, qu’hasta agora namái tenía un serviciu. Esta apuesta permitirá contemplar los trabayos de la Xunta Asesora de Toponimia y xeneralizar l’usu de la toponimia tradicional; poner en marcha’l Conseyu Asesor de Política Llingüística; algamar un avance significativu na programación del asturianu na RTPA; avanzar na implantación de ferramientes dixitales que permita la torna en llinia del asturianu al castellanu y del castellanu al asturianu; y una mayor coordinación colos servicios de normalización llingüística, que tienen que reforciar la so posición central na difusión d’actividaes de política llingüística”.

Entes les partíes que destacó Piñán, que nesta comparecencia emplegó’l castellanu dende’l primer momentu, acatando asina la interpretación que los servicios xurídicos de la Xunta Xeneral faen del reglamentu de la Cámara, ta la destinada a la “contratación cola Universidá d’Uviéu de los servicios de meyora lexicográfica del proyeutu Eslema, en funcionamientu dende hai décades, que necesita una actualización”. D’igual forma apuntó “la contratación de trabayos informáticos del traductor asturianu-castellanu y castellanu-asturianu como pasu previu a la implantación xeneralizada nos servicios del Principáu”.

El costu final de desendolcu del Eslema afítase en 60.000 euros, apunten dende la conseyería. Mentes, van destinase 42.100 euros pa la ellaboración de “un estudiu sobre'l futuru xurídicu y socioeconómicu del asturianu y gallego-asturiano”.

Piñán tamién apuntó na so intervención que’l presupuestu caltién les aportaciones pa les actuaciones culturales que desarrolla, como la Selmana de les Lletres, el Día del Llibru Premios Lliterarios, asina como la recuperación de l’Axenda Didáutica con otro formatu. D’igual forma, destacó la inversión de 313.520 euros en servicios de normalización llingüística en collaboración con dellos conceyos.

Enfotu na promoción del Xacobéu

No que respeuta a otros departamentos, Piñán afondó enforma na actuación tresversal na que participarán toles árees de la conseyería p’afrontar la celebración del Xacobéu 2021 yá dende l’añu qu’entra. Destinaráse a la promoción y al acondicionamientu de les rutes xacobees cerca d’un millón d’euros, siendo bona parte del esfuerciu presupuestariu pal Camín de Santiago pa la promoción turística en campañes estatales y internacionales.

Ente les otres munches prioridaes de la conseyería, Piñán quixo destacar dos: el traductor asturianu-castellanu y l’apoyu de la Direición Xeneral de Deporte a la incorporación de la muyer a l’actividad deportiva específicamente nel mundu rural, con subvenciones a les entidaes que se sumen a tal iniciativa. La consignación pa la proteición y la conservación del patrimoniu histórico-artísticu algama los 3.806.690 euros, de los que 100.000 van al Plan del Prerrománicu.