"Tamos fondamente deceicionaos col presupuestu pal asturianu", diz Podemos

Asturies pela Izquierda considera curtia l'aportación de 1,9 millones, mentes que VOX critica que "la única ganadora d'esta conseyería ye la promoción del asturianu".

Rafael Palacios, diputáu de Podemos qu'emplegó l'idioma na so intervención, amosóse mui críticu colos presupuestos de la Conseyería de Cultura, Política Llingüística y Turismu, que, considera, "siguen la estela de los de Javier Fernández". No que respueta a la promoción del asturianu aseguró que "tamos fondamente deceicionaos", refugando'l "regalu de 70.000 euros a la TPA": "Nun Gobiernu d'Adrián Barbón y Berta Piñán nun pensábamos que díbemos ver les mesmes cantidaes, los mesmos compromisos, que gobiernos de Javier Fernández, o menos compromisos entovía que gobiernos de persones que yeren francamente antillingua y francamente antioficialidá de la llingua asturiana".

Ángela Vallina, parllamentaria d'Asturies pela Izquierda, calificó'l presupuestu d'izquierda, destacando unes cuentes que permiten "dar continuidá a munches de les polítiques de promoción cultural, d'apoyo a museos, archivos y biblioteques, y proteición del patrimoniu histórico-artísticu del patrimoniu del anterior presupuestu pautáu poles fuercies de la izquierda", esperando del equipu entrante comandáu pola conseyera Berta Piñán "una meyor xestión". Sicasí, anque valoró l'aumentu de la partida pa la promoción del asturianu "que supone reconocer una realidá social", refirióse a la mesma como "una anéudota en comparanza colos más de 8 millones que destina la comunidá vecina pa la so llingua, que ye'l gallegu".

Del restu de fuercies, namái amosó interés pol asturianu VOX, entrugando Ignacio Blanco a Piñán por delles partíes, como la de 307.000 euros de 'Reuniones y conferencies' –Antón García, direutor xeneral de Política Llingüística, esplicó que diben pa la organización de la Selmana de les Lletres Asturianes, el Premiu al Meyor Cantar y la Feria del Llibru y Discu n'Asturianu, ente otros eventos– o'l repartu de les subvenciones a los servicios de normalización llingüística. Llueu, na fixación de posiciones, el diputáu afirmó que con estos presupuestos "el Gobiernu del Principáu d'Asturies nun apuesta pola xeneración de riqueza", asegurando que "los grandes perdedores d'esta conseyería son Cultura, Turismu y Patrimoniu, y la única ganadora d'esta conseyería ye la promoción del asturianu o la llingua, como quieran llamalo vustedes, porque ye asina, ye una apuesta política".