Payares finó con 76 paraos más n'Asturies

Con un total de 57.984 desemplegaos, el país rexistra la cifra más baxa pa esti mes dende'l 2007 y la más alta, dende'l 2010, d'afiliaos a la Seguridá Social, 379.280 persones trabayando.

Asturies ye una de les nueve comunidaes y ciudaes autónomes onde medró'l paru en payares. Foi una cifra curtia, 76 persones, qu'aumenta la cantidá de meses de crecimientu del númberu de demandantes d'emplegu a cuatro.

La media estatal foi un descensu del 0,89 por cientu al contar 24.573 desemplegaos menos que ponen el total en 2.734.831, mentes que l'asturiana reflexa un 0,13 por cientu d'incrementu. Les meyores cifres son les d'Estremaúra (2,45 por cientu), siguida pola Comunidad de Madrid (2,21) y Galicia (1,63), mentes que les peores son les de Illes Balears (4,20), Castilla y Lleón (1,62) y Cantabria (1,03).

Por sectores, industria foi'l que más baxada rexistró n'Asturies, un 2,54 por cientu. Nel llau contrariu, na construcción el desemplegu medró un 1,62 por cientu.

En términos añales, el país cuanta con 5.017 paraos menos qu'en payares del 2022, lo que supón un descensu del 7,96 por cientu, mayor que la media estatal, del 5,09 por cientu rebaxar la llista de demandantes d'emplegu en 146.549. Con un 9,72 por cientu, Illes Balears lidera esti datu, siguida por Aragón (9,11) y Canarias (8,45), mentes que los descensos más baxos son los de la Comunidad de Madrid (1,84), Euskadi (2,31) y Catalunya (2,60).

Mengua de persones actives en comparanza con ochobre

Magar contar colos datos más altos pa un payares dende'l 2010, les afiliaciones a la Seguridá Social baxaron en 519 persones, de 379.799 a 379.280. Si miramos los datos d'esti mes nel 2022, hai un aumentu de 6.759.

No que respeuta a la contratación, hebo 14,23 por ciento menos de firmes, pasando de 22.225 a 19.062. En comparanza con va un añu, el descensu ye del 0,74 por cientu.