El paru medra per tercer mes siguíu n'Asturies

Hai 1.571 demandantes d'emplegu más, un aumentu del 2,79 por cientu, perriba de la media estatal, que queda nel 1,36.

El paru medró n'Asturies per tercer mes siguíu y el númberu total queda en 57.908. Sicasí, ye'l mes de payares con meyores cifres en 15 años.

El sector con peor evolución foi la industria, con un aumentu del 5,43 por cientu. Nel casu de tomar cantidaes absolutes, el protagonismo correspuende a los servicios: 1.308 parados más o, lo que ye lo mesmo, el 83 por cientu de los paraos nuevos.

A nivel estatal xubió esti ochobre en 36.936 persones que coloca'l global en 2.759.404. Namás baxa'l desemplegu na Comunidad de Madrid, un 0,06 por cientu, mentes que lidera la xuba Illes Balears (4,85 por cientu), Melilla (4,61) y Cantabria (3,61).

En términos interañales, hai 4.731 desemplegaos menos n'Asturies, un descensu del 7,55 por cientu, superior a la media estatal, que queda nun 5,33 por cientu al rexistrar 155.488 menos, y el mes 31 d'ameyoramientu de los datos. Lideren la baxada Illes Balears (9,41 por cientu), Ceuta (9,08) y Aragón (9,02), atopándose na otra parte de la llista Euskadi (1,88), Comunidad de Madrid (2,12) y Catalunya (2,39).

Más afiliaos a la Seguridá Social

L'aumentu del paru nun impide una medra del emplegu, yá qu'Asturies cuenta con 855 afiliaciones más a la Seguridá Social en comparanza con setiembre. El total afítase en 379.799.

No que respeuta a los contratos de trabayu, firmáronse esti ochobre 22.225, un 9,2 por cientu más que'l mes anterior.