Pablo X. Suárez va disfrutar n'avientu n'A Coruña de la Beca Asturies de Lliteratura

|
Pablo X. Suárez

'Retablu rural, una mirada realista a l’aldea contemporánea' ye'l proyeutu que va trabayar a lo llargo d'un mes na Residencia Literaria 1863.

Ente tolos presentaos, el de Pablo X. Suárez resultó'l más interesante pal xuráu, que rescampló del mesmu que fora una "propuesta narrativa mui bien estructurada y con una mirada novedosa sobre’l mundu rural asturianu". Los encargaos de decidir el merecedor de la beca que naz d'un conveniu ente la Conseyería de Cultura, Política Llingüística y Turismu y la residencia gallega promovida pola poeta Yolanda Castaño, col oxetivu de sofitar la creación lliteraria ufiertando la posibilidá a un autor n'asturianu o gallego-asturiano de disponder d'un entornu afayadizu pa ello, foron Francisco 'Paco' Álvarez, Esther Prieto y Miguel R. Monteavaro, primer asturianu en disfrutar d'una estancia d'esti calter gracies al proyeutu multidisciplinar ‘A luz, Orión e a nova luz’.

El sierense va pasar del 1 al 31 d'avientu n'A Coruña, na Residencia Literaria 1863, un céntricu apartamentu marineru del sieglu XIX con vista a la mar, qu'estrenó'l poeta chilenu Raúl Zurita en febreru del 2019. Nesti tiempu pasaron pel llugar escritores de munches nacionalidaes que, amás de contar con un espaciu, un tiempu, un contestu y unes condiciones ideales pa poder desendolcar el procesu creativu, pudieron vivir l'ambiente cultural de la ciudá gallega.

La Beca Asturies de Lliteratura Asturiana en Residencia inclúi la estancia y el desplazamientu dende Asturies, amás de 800 euros en concepto de mantención y l'accesu prioritariu a toles actividaes culturales d'A Coruña. Una vez fináu'l periodu, con un plazu de 15 díes, l'autor ha presentar a la Residencia Literaria 1863 el resultáu del trabayu fechu n'A Coruña, asina como una memoria final na que valore la esperiencia disfrutada.

Contador Estadistiques