Los proyeutos pa disfutar d'una estancia d'un mes nel apartamentu xestionaú por Yolanda Castaño pueden presentase hasta'l día 30.
La Residencia Lliteraria 1863, en collaboración cola Viceconseyería de Cultura, Política Llingüística y Deporte, ta acabante de convocar la tercer edición de la beca 'Asturies' de creación n'asturianu y gallego-asturiano. Tolos autores activos mayores de 18 años que tengan espublizaos a lo menos un llibru pueden aspirar a la estancia per tol mes d'avientu nesti pisu d'A Coruña pa desendolcar un proyeutu lliterariu.
Miguel Rodríguez Monteavaro y Pablo X. Suárez son los escritores que yá pudieron vivir la esperiencia, con comentarios positivos a la mesma. La finalidá de la beca ye "l’apoyu, promoción y estímulu de la creación lliteraria en llingua asturiana o gallego-asturianu, potenciando’l so desenvolvimientu creativu col mayor rigor y escelencia", amás de proporcionar "un espaciu, un tiempu, un contestu y unes condiciones ideales pa la dedicación dafechu al so propiu proyeutu de creación lliteraria".
El merecedor de la estancia na Residencia Literaria 1863 va tener pagáu'l treslláu a A Coruña dende Asturies y va recibir 800 euros pa gastos d'agospiamentu nel apartamentu "construyíu en 1863, añu que marca’l Rexurdimento de la lliteratura gallega, remocicáu dafechu pa facilitar la máxima concentración y inspiración nel trabayu lliterariu". Ésti, asitiáu nel centru de la ciudá, a dos portales d'onde naciere la Real Academia Galega, y con vista a la mar, ta revestíu de "muries centenaries de piedra, vigues de castañal y suelu hidráulico".
Cuenta con espaciu de trabayu, salón, cocina, biblioteca, cuartu y bañu, amás de conexones wifi, ethernet y USB, electrodomésticos y toles comodidaes pa una estancia autosuficiente pal periodu de disfrute de la beca. Amás, va ponese a disposición del o de la beneficiaria un serviciu básicu de llimpieza.
El fallu, n'ochobre
Enantes del 15 d’ochobre va dase a conocer l’autora o autor que va disfrutar de la beca, que va apareyada al menos a una presentación públicu del so proyeutu nun actu n'A Coruña. La estancia na Residencia Literaria 1863 va permitir tamién conocer fondamente la vida cultural de la ciudá, con accesu prioritariu a museos, teatros o conciertos.
El día 30 a les 22 hores fina'l plazu pa la presentación del dossier cola propuesta y tolos documentos que s'esixen nes bases que se pueden consultar al final d'esta noticia.
Adxuntu | Tamañu |
---|---|
![]() | 194.61 KB |