La Residencia Literaria 1863 d’A Coruña va acoyer una nueva estancia d'un autor asturianu

Política Llingüística ta acabante de convocar la segunda edición de la ‘Beca Asturies de Lliteratura Asturiana en Residencia’, con plazu pa presentar solicitúes hasta’l 15 de setiembre. Ésta sofita parte de los gastos d’una estancia d’un mes na Residencia Literaria 1863 d’A Coruña pa desendolcar un proyectu lliterariu.

El direutor xeneral Antón García aconceyó esta mañana cola poeta gallega Yolanda Castaño, promotora de la Residencia Literaria 1863, onde Miguel Rodríguez Monteavaro disfrutó d’una estancia n’avientu pa desarrollar el proyectu multidisciplinar ‘A luz, Orión e a nova luz’, con una esperiencia mui positiva según confesó’l propiu autor a Asturies.com. El de Bual ganó la primer edición de la beca, que tien agora continuidá.

El merecedor d’esta ayuda va contar cola posibilidá de pasar un mes nun entornu afayadizu pa poner en marcha tol procesu creativu y al empar integrase na vida cultura de la ciudá gallega. “Busca apurri-yos a los y les escritores en llingua asturiana un espaciu, un tiempu, un contestu y unes condiciones óptimes pa la entera dedicación al so propiu proyectu de creación lliteraria”, apunten dende Política Llingüística.

Pueden acceder a la beca aquellos autores n’asturianu y gallego-asturiano mayores de 18 años con polo menos un llibru espublizáu. El plazu de solicitúes ta abiertu hasta'l 15 de setiembre y les bases de la convocatoria van poder consultase pronto na web de la direición xeneral.

Apartamentu marineru del sieglu XIX

La Residencia Literaria 1863 asítiase nun céntricu apartamentu marineru del sieglu XIX con vista a la mar. Llevantóse en concreto nel 1863, añu nel que Rosalía de Castro, que vivió mui cerca, espublizó los sos ‘Cantares gallegos’, y cuenta con paredes de piedra y vigues de castañu.